Tiranë: 68 të arrestuar dhe 20 policë të lënduar pas tubimit të djeshëm

Njëzet policë të lënduar, 68 persona në pranga dhe 22 të tjerë nën hetim: ky është bilanci që Policia e Shtetit ka bërë publik pas tubimit që u zhvillua dje në Tiranë, pa sqaruar në njoftimin e saj se kush e kishte organizuar.

Arrestimet u kryen në flagrancë nga strukturat e Drejtorisë Vendore të Policisë Tiranë, në vijim të veprimeve hetimore dhe procedurale për ngjarjet gjatë tubimit. "Gjatë tubimit të djeshëm janë dëmtuar 20 punonjës Policie", thuhet në deklaratën zyrtare.

Mes të arrestuarve ka 61 të rritur, të identifikuar nga policia vetëm me inicialet e emrit dhe mbiemrit, me moshë nga 18 deri në 53 vjeç. Një pjesë e konsiderueshme e tyre janë të rinj sapo mbushur 18 vjeç ose në fillim të të njëzetave. Në listë përfshihen edhe shtatë të mitur, të moshës 15 deri në 17 vjeç. Përveç tyre, 22 persona të tjerë u proceduan penalisht pa u arrestuar.

Sipas policisë, të gjithë ata dyshohen për sulme ndaj uniformave blu dhe ndaj objekteve. "Këta shtetas dyshohet se kanë qëlluar me gurë, sende të tjera të forta, lëndë piroteknike në drejtim të punonjësve të Policisë dhe godinave të institucioneve publike dhe private, duke dëmtuar fizikisht punonjësit e Policisë dhe duke shkaktuar dëme materiale në godinë dhe në sinjalistikën rrugore", deklaroi Policia e Shtetit.

Dosja tashmë ka kaluar në duart e akuzës. "Materialet procedurale iu referuan Prokurorisë, për veprime të mëtejshme", njofton policia. Deri në një vendim të organeve të drejtësisë, të gjithë personat e përfshirë mbeten të dyshuar.