Times Square nën flamurë: diaspora proteston pas dënimit me 81 vjet të ish-krerëve të UÇK-së

Protesta e diasporës shqiptare kaloi oqeanin dhe u ndal në një nga sheshet më të fotografuara të botës. Mbrëmë, në Times Square të Nju Jorkut, shqiptarë të ardhur nga diaspora u mblodhën për të shprehur mbështetjen për ish-krerët e UÇK-së, pas aktgjykimit të shkallës së parë të shpallur nga Dhomat e Specializuara të Kosovës në Hagë, me të cilin ata u dënuan me gjithsej 81 vjet burgim.

Pamje nga tubimi publikoi në rrjetet sociale prefekti i Tiranës, Shkëlqim Hajdari, i cili shkroi se diaspora u mblodh "si një trup i vetëm".

"TË GJITHË BASHKË, PËR NJË QËLLIM, LIRI PËR ÇLIRIMTARËT! Mbrëmë, diaspora shqiptare u mblodh si një trup i vetëm, me një zë dhe me një qëllim: të qëndrojmë pranë vëllezërve tanë, ish-krerëve të UÇK-së, të cilët ne besojmë se janë dënuar padrejtësisht", shkroi Hajdari.

Sipas tij dhe protestuesve, dënimi është i padrejtë. Prefekti i Tiranës u ndal edhe në mesazhin e bashkimit mbi ndarjet krahinore.

"Pavarësisht se nga cila trevë shqiptare vijmë, sot na bashkon Kosova, na bashkon historia jonë dhe respekti për ata që luftuan dhe sakrifikuan për lirinë e saj", deklaroi ai.

Reagimin e mbylli me një thirrje për liri, drejtësi dhe dinjitet, duke theksuar se diaspora nuk i harron ish-krerët e UÇK-së e as sakrificën e popullit të Kosovës: "Nga Amerika e kudo në diasporë, mesazhi ynë është i qartë: nuk i harrojmë çlirimtarët tanë dhe nuk harrojmë sakrificën e popullit të Kosovës". Fjalët e fundit të postimit të tij: "Së bashku për vëllezërit tanë. Së bashku për çlirimtarët".

Aktgjykimi i Hagës, i shkallës së parë, mbetet i atakueshëm në procedurë dhe ka prodhuar valë reagimesh politike në Shqipëri e Kosovë, ku aktgjykimi është cilësuar publikisht si i padrejtë nga zyrtarë dhe struktura politike. Tubimi në Times Square është shprehja e parë e këtij reagimi jashtë hapësirës shqiptare, në një shesh të zgjedhur pikërisht për vizibilitetin e tij ndërkombëtar.