Time Kadrijaj s'kërkon falje: "Nuk jam penduar që e godita me vezë Kurtin"

Deputetja e Aleancës, Time Kadrijaj, nuk tërhiqet nga veprimi i saj ndaj kryeministrit të Kosovës, Albin Kurti. Në një deklaratë për portalin Indeksonline, ajo tha se nuk ndihet e penduar që e goditi Kurtin me vezë dhe se e bëri këtë veprim në mënyrë të vetëdijshme.

"Nuk jam pishman që e godita me vezë Albin Kurtin. E kam bërë me vetëdije të plotë", u shpreh Kadrijaj.

Deputetja e lidhi qëndrimin e saj me atë që e quan mbrojtje të rendit kushtetues, duke paralajmëruar se do të vazhdojë të reagojë sa herë që, sipas saj, cenohet Kushtetuta e Kosovës. "Në rast se shkelet Kushtetuta, nuk ndalem së kërkuari drejtësi", tha ajo.

Kadrijaj drejtoi kritika të drejtpërdrejta ndaj kryeministrit, duke pretenduar se ai nuk ka të drejtë të veprojë në kundërshtim me shtetin dhe Kushtetutën. "Kurti s'ka të drejtë të luajë me shtetin dhe Kushtetutën e Kosovës", theksoi deputetja.