Thika brenda kampusit: tre të plagosur në një kolegj në Nju Jork, dy të dyshuar në pranga

Një nga viktimat u godit me thikë në shpinë, një tjetër në kokë. Kjo është pasqyra e dhunës që shpërtheu pak pas orës 12:30 të mërkurës në Westchester Community College, në Valhalla të qarkut Westchester, në shtetin amerikan të Nju Jorkut.

Sipas zyrtarëve të qarkut Westchester, në numrin e urgjencës 911 mbërritën telefonata të shumta për një goditje me thikë brenda kolegjit. Tre persona përfunduan të plagosur. Për natyrën e plagës së viktimës së tretë nuk u dhanë detaje të menjëhershme.

Dy prej të plagosurve u dërguan në Westchester Medical Center, ku një zëdhenës i spitalit i përshkroi gjendjet e tyre si "stable", domethënë të stabilizuara. Të tjerët e përfshirë në incident, përfshirë personin që kreu goditjen, u transportuan në institucione të tjera shëndetësore, shtoi zëdhenësi i spitalit.

Dy të dyshuar u ndaluan brenda ambienteve të kolegjit dhe një thikë u gjet në vendin e ngjarjes, bënë të ditur zyrtarët e qarkut. Policia nuk është në kërkim të asnjë të dyshuari tjetër. Studentëve u shkoi një mesazh me tekst nga policia, që i informonte se situata ishte marrë nën kontroll.

Hetimi vazhdon. Policia e qarkut Westchester u ka bërë thirrje kujtdo që ka informacione ose material video nga incidenti të lidhet në numrin 914-864-7701 ose të dërgojë informacione në adresën tips@wccops.com.