ReklamëHapësirë reklame
ReklamëHapësirë reklame
Reklamë
Pas vendimit të Dhomave të Specializuara, mbrojtja e Hashim Thaçit njoftoi ankesë në Panelin e Apelit, duke pretenduar gabime ligjore dhe faktike, ndërsa në Burojë një familjar i tij përshkroi ditën e shpalljes së vendimit si ditë zie.
Pas dënimit të shqiptuar në Hagë, ish-presidenti i Kosovës, Hashim Thaçi, doli publikisht për herë të parë përmes avokatit të tij kryesor, Luka Mishetiç, me një mesazh të dyfishtë: falënderim për mbështetjen dhe thirrje për qetësi. Në të njëjtën kohë, mbrojtja bëri të ditur se do të ankohet kundër vendimit të Trupit Gjykues.
Thaçi, i cilësuar nga vendimi i gjykatës si përgjegjës për krime lufte, u dënua me 25 vjet burgim nga Gjykata Speciale, ndërsa vendimi dënues u shqiptua më 16 shtator në Hagë.
"Hashim Thaçi dëshiron të shprehë mirënjohjen e tij të sinqertë për mbështetjen e jashtëzakonshme që ai, Kadri Veseli, Rexhep Selimi dhe Jakup Krasniqi kanë marrë nga qytetarët e Kosovës dhe nga mbështetësit ndërkombëtarë, si edhe t'i bëjë thirrje qytetarëve të Kosovës të mbeten të qetë si përgjigje ndaj padrejtësisë së ditës së djeshme", thuhet në fillim të deklaratës së Mishetiçit.
Sipas mbrojtjes, ekipi do të "paraqesë ankesë kundër vendimit të djeshëm të Trupit Gjykues pranë Panelit të Apelit të Dhomave të Specializuara të Kosovës (DSK), me pretendimin se janë bërë gabime të konsiderueshme ligjore dhe faktike që kanë dëmtuar drejtësinë e procedurës gjyqësore".
Mishetiçi pretendoi se dyshimet për paanshmërinë e procesit janë shprehur gjatë gjithë gjykimit. "Gjatë të gjithë procedurës gjyqësore, Mbrojtja ka shprehur vazhdimisht shqetësime në lidhje me drejtësinë procedurale, përfshirë gamën e gjerë të pyetjeve që u shtruan drejtpërdrejt nga anëtarët e Trupit Gjykues, në një mënyrë që, sipas mendimit të saj, nuk krijonte përshtypjen e paanshmërisë", deklaroi ai, duke shtuar se mbrojtja mbetet në qëndrimin se "ndërhyrjet gjyqësore kaluan kufirin e kërkimit neutral të së vërtetës, duke dëmtuar përshtypjen e paanshmërisë që kërkohet sipas standardeve ndërkombëtare të drejtësisë".
"Sipas pretendimeve të Mbrojtjes, kjo mangësi e paanshmërisë tani është reflektuar edhe në vendimin e Trupit Gjykues", thotë avokati. Mbrojtja pretendon po ashtu se "përfundimet e Trupit Gjykues për fajësinë përtej dyshimit të arsyeshëm bazohen në dëshmi të pamjaftueshme dhe të pakonfirmuara".
Një pjesë e ankesës lidhet me trajtimin e një rasti vrasjeje. "Për më tepër, Trupi Gjykues dje deklaroi publikisht se Thaçi ishte i përfshirë në vrasjen e Behajdin Alakut, pasi më parë kishte urdhëruar të gjitha palët në këtë çështje që gjatë seancave gjyqësore të mos diskutojnë publikisht rastin e zotit Alaku, si edhe që të gjitha dëshmitë në lidhje me këtë rast të jenë konfidenciale", citohet deklarata e mbrojtjes. "Kështu, sipas mendimit të Mbrojtjes, Trupi Gjykues e shpalli publikisht Thaçin fajtor për një vrasje, ndërkohë që njëkohësisht fshehu nga publiku dhe nga shqyrtimi publik dëshmitë në të cilat bazohet ky përfundim. Zoti Thaçi do ta mirëpriste një shqyrtim të tillë publik të dëshmive", thuhet më tej.
Ankesa, sipas avokatit, do të paraqitet edhe kundër vendimeve të Trupit Gjykues "për shkak të shkeljes së të drejtave të tij themelore për një gjykim të drejtë, të garantuara me Konventën Evropiane për të Drejtat e Njeriut dhe me Kushtetutën e Kosovës". Mbrojtja theksoi se "Thaçi mohon shprehimisht çdo përfshirje në vrasje".
Ndërkohë, larg sallës së gjyqit në Hagë, dita e vendimit u përcoll nga familjarë dhe mbështetës të katër krerëve të Ushtrisë Çlirimtare të Kosovës, me shpresën se do të vinte lirimi i tyre. Në Burojë, Milazim Thaçi, plak dhe familjar i ish-presidentit, rrëfeu se pritja përfundoi me dhimbje.
"Ne dje me shpresë, ata të katërtit se po lirohen, por nuk na doli ashtu, doli idhnim. Është në zi Kosova e krejt shqiptaria. Ata e kanë ruajtur shtëpinë e tyre, familjen dhe Kosovën, nuk kanë dalë me thënë po shkojmë në Serbi. Po Serbia na ka ardhur këtu, na ka sulmuar, dhunuar, kallur e plaçkitur, të gjitha të zezat na ka bë e sot me dalë ata me u end nëpër Serbi e Evropë e tanë me na dërgu në Hagë, kjo është padrejtësi e madhe. Ajo Evropë, që e ka ndarë tokën shqiptare, ajo është edhe sot, marre ju qoftë atyre gjyqtarëve. Kemi pritur e jemi mërzitur", tha ai.
Momentin e shqiptimit të vendimit e përshkroi si veçanërisht të rëndë, ndërsa shpresat tani i lidh me procesin e apelit. "Zoti e di, gati më ka lëshuar shpirti. Në atë moment, më keq më, a beson gogja moti mërzi kështu nuk kam pasur. Këta po japin shpresë në Apel, shpresoj i lirojnë, e vijnë te familja e vet, nana e vet. Halla e ratë është, ajo nuk di ende asgjë, më mirë që nuk e di, por në pritje është. Ata jo se janë dënuar, por krejt Ushtria Çlirimtare e Kosovës dhe krejt shqiptarët kudo që janë. Ata kanë qenë çlirimtarë, nuk kanë qenë grabitqarë", u shpreh ai.
Ai kritikoi edhe institucionet e Kosovës, duke kërkuar angazhim më të madh për ish-krerët e UÇK-së. "Shteti nuk ka bërë hiç punë. Ju lutem shtetit e krejt kush ia do të mirën shqiptarisë e UÇK-së, e kemi trenin e fundit të bëjmë sa më shumë e me i lirua ata çlirimtarë. Ata të gjitha i kanë dhënë për Kosovë. Duhet me u bashkua i gjithë populli shqiptar për të gjitha. Ajo është marri e madhe, duhet me u bashku, se sa të jemi të bashkuar jemi më të fortë. Kështu ndaras nuk ka lezet. Mos të flasim keq për njëri-tjetrin, ju kisha lut si vëllezër e shokë", tha Milazim Thaçi.
Në fund, ai u kthye te kujtimet, duke përmendur një takim pas luftës dhe një bisedë me ish-presidentin. "Be ka bë nana e vet, kur ka ardhë një herë, nuk kena mundur çizmet me ia heq prej këmbëve, derisa kanë ndez zjarrin dhe e kanë nxehur atëherë i ka heq. Jakupi ka qenë edhe në burg të Jugosllavisë, tash edhe këtu, më është dhimbsur shumë se është i moçëm. Me presidentin Thaçi, kur jemi pa pas lufte, erdh me një veturë dhe më tha o baca Mil, e çeli derën, i thashë mos dil, tha po Zoti të lështë shnosh për të gjitha viktimat në Izbicë. Edhe një herë isha me babën e Hashimit në arë, erdh ai foli me mua, thashë të çohem, tha pa e pi një kafe nuk do shkosh. Dhe shumë herë të tjera", rrëfeu ai.
Vendimi i shkallës së parë tani kalon në duart e Panelit të Apelit të Dhomave të Specializuara, ku mbrojtja e Thaçit do të kërkojë rrëzimin e konstatimeve për fajësi.
Pas vitesh pritjeje, mosmarrëveshja për qindra miliona euro të paguara nga buxhetet komunale arriti në fazën e parë dëgjimore. Drejtori ekzekutiv i AKK-së, Sazan Ibrahimi, thotë se niveli qendror as që u paraqit.
