Tetova hap vetë rrugën drejt Prizrenit: 250 mijë euro nga arka komunale

Projekti i rrugës që synon të lidhë Tetovën me Prizrenin ka dalë nga letrat dhe ka nisur në terren, por jo nga ana e Kosovës. Autoritetet lokale në Tetovë kanë filluar me vetëfinancim hapjen e trasesë së parë dhe të kilometrave të parë drejt pikës ku është paraparë tuneli ndërkufitar.

Deri më tani janë hapur kilometrat e parë të qarkores mbi fshatin Shipkovicë, segment që parashihet të lidhet me pjesën ku do të çelet tuneli. Punimet po financohen nga buxheti i Komunës së Tetovës, e cila synon ta mbyllë fazën e parë para se t'i drejtohet për mbështetje ekzekutivit qendror.

Zëvendëskryetari i Komunës së Tetovës, Albi Qamili, e ka shifruar koston e kësaj faze: "Pra, nga fshati Shipkovicë deri te tuneli, i cili parashikohet të lidhë Tetovën me Prizrenin, projekt ky i cili kushton 250 mijë euro, i tëri i financuar nga Komuna e Tetovës, është duke u punuar intensivisht dhe së shpejti kjo trase pritet të depërtohet plotësisht. Më pas do të shkojmë me fazën tjetër, për asfaltimin e kësaj traseje, mirëpo për punën e asfaltimit të rrugës Tetovë-Prizren deri te tuneli do të shohim edhe mundësitë e bashkëpunimit edhe me Qeverinë e Maqedonisë së Veriut".

Pjesa më e shtrenjtë dhe më e ndërlikuar e projektit, tuneli, mbetet ende në fazën e letrave. Komuna e Tetovës njofton se së shpejti pritet të hapet tenderimi për projektimin e tij, ndërsa në takimin e fundit të zhvilluar në Shkup, zëvendësministrat e Transportit nga Maqedonia e Veriut dhe Kosova konfirmuan se dy qeveritë po sinkronizojnë hapat për segmentin ndërkufitar.

Sa do të kushtojë ky segment dhe kush do ta paguajë, ende nuk dihet. Ministria e Transportit në Shkup, përmes një komunikate, ka bërë të ditur se llogaritë do të mbyllen vetëm pasi të përfundojë projektimi: "Pas përfundimit të projektimit do të mund të përcaktohen në mënyrë precize edhe vlera e investimit për ndërtimin, mënyra e financimit dhe pjesa që do të mbulohet nga secila prej dy qeverive".

Rruga Tetovë-Prizren mëton të krijojë një korridor të ri tregtar dhe ekonomik, duke shkurtuar kohën e transportit ndërmjet dy shteteve. Me hapjen e trasesë lokale, hapi vendimtar u kalon tashmë dikastereve qeveritare.