ReklamëHapësirë reklame
ReklamëHapësirë reklame
Reklamë
Asnjë parti parlamentare nuk ka dalë ende me një kandidat për kreun e shtetit, ndërsa ora kushtetuese mbyllet më 6 tetor. Pa marrëveshje, Kosova mund të shkojë në zgjedhjet e katërta që nga shkurti i vitit 2025.
Tetë ditë para afatit të fundit, Kosova nuk ka ende as një emër në tryezë për presidentin e ri. Asnjë nga partitë parlamentare nuk ka paraqitur propozim. Nëse Kuvendi nuk e përmbyll zgjedhjen e kreut të shtetit deri më 6 tetor 2026, vendi mund të përfundojë sërish në zgjedhje të reja parlamentare.
Afati është vendosur nga Gjykata Kushtetuese. Në aktgjykimin e 23 shtatorit, ajo sqaroi se periudha 60-ditore për zgjedhjen e presidentit nisi më 8 gusht, ditën kur u konstituua Kuvendi, dhe mbyllet më 6 tetor. Kosova ka ushtrues detyre të presidentit që nga 4 prilli, ndërsa Kushtetuta nuk lejon që ky funksion të ushtrohet më shumë se gjashtë muaj. Aktualisht, detyrën e presidentes e ushtron kryetarja e Kuvendit, Albulena Haxhiu (LVV), të cilës mandati gjashtëmujor në këtë pozitë i skadon më 4 tetor. Si do të zgjidhet kjo çështje pas asaj date, nuk dihet ende.
Kuvendi u mblodh më 28 shtator, por zgjedhja e presidentit nuk ishte në rendin e ditës. Në atë seancë deputetët zgjodhën Vlora Çitakun e PDK-së nënkryetare të Kuvendit, me 95 vota për, asnjë kundër dhe asnjë abstenim, duke e kompletuar kështu Kryesinë. Pas seancës, përfaqësuesit e partive nuk dhanë asnjë sinjal për marrëveshje rreth ndonjë kandidati.
Lëvizja Vetëvendosje, partia më e madhe parlamentare, nuk ka bërë të ditur nëse ka një kandidat. Një ditë para seancës, më 27 shtator, kryeministri Albin Kurti u takua veçmas me kryetarin e PDK-së, Bedri Hamza, dhe me kryetarin e LDK-së, Lumir Abdixhiku. Takimet u zhvilluan për deklaratën e përbashkët lidhur me aktgjykimin e Dhomave të Specializuara të Kosovës. Hamza, megjithatë, u tha gazetarëve se me Kurtin u fol edhe për presidentin, por jo për emra konkretë. "Nuk kemi shkuar për emrat, nuk i kemi folur, nëse kalohet ligji jemi të hapur edhe për tema tjera", tha ai.
Ligji në fjalë është projektligji i PDK-së për ndryshimin dhe plotësimin e ligjit për Dhomat e Specializuara të Kosovës në Hagë. Hamza tha se partia e tij është e gatshme të diskutojë më tej çështjen e presidentit me Vetëvendosjen nëse ky projektligj miratohet. Dokumenti ndodhet aktualisht në Qeveri, ku është dërguar për mendim më 25 shtator.
Shefi i Grupit Parlamentar të PDK-së, Arian Tahiri, e mohoi që votimi për projektligjin të kushtëzojë votimin për presidentin. "Janë tema që nuk duhet me i lidhë. Ligji është temë e veçantë, është përgjegjësi kombëtare, institucionale, politike dhe individuale e secilit deputet shqiptar. Ndërsa çështja e presidentit është çështje e vullnetit të partive politike, që patjetër duhet me pasë qasje proaktive, konsensus dhe mos me qenë shkaktarë të zgjedhjeve të njëpasnjëshme", tha Tahiri.
Kurti e kishte bërë të qartë skenarin alternativ që më 25 shtator. "Nëse nuk do të arrijmë të zgjedhim president të ri, do të shkojmë sërish në zgjedhje, që do të jenë zgjedhjet e katërta brenda dy viteve. Zgjedhjet e reja janë të panevojshme e të kushtueshme", deklaroi kryeministri.
Në LDK thonë se janë gati të ndihmojnë, por pa u lidhur paraprakisht me asnjë emër. Shefja e Grupit Parlamentar të LDK-së, Jehona Lushaku, tha: "Ne edhe si parti kemi thënë që është e rëndësishme që t’i shmangim zgjedhjet, meqë kemi pasur zgjedhje, por kjo kërkon vullnetin e të gjitha grupeve parlamentare, ose të gjitha partive politike. Ne, si të vetëm, nuk mundemi me i dhanë president Kosovës, por jemi të gatshëm që të japim kontributin tonë për themelimin e këtyre institucioneve. Ne nuk jemi në një situatë ku mund të themi jemi ‘për’ ose ‘kundër’ një kandidati, meqë kemi një situatë të re".
Kjo "situatë e re" lindi pas dështimit të përpjekjes së vetme konkrete deri tani. Në fund të gushtit, LVV dhe LDK arritën marrëveshje për një president konsensual dhe propozuan Bekim Sejdiun. Një ditë pas njoftimit u mësua se gjashtë deputetë të LDK-së nuk e mbështesnin kandidaturën, gjë që e linte Sejdiun pa 81 votat e nevojshme, pra dy të tretat e Kuvendit me 120 ulëse. Kandidatura nuk arriti kurrë në votim dhe më 14 shtator Sejdiu njoftoi tërheqjen. Që atëherë, asnjë emër tjetër nuk është bërë publik.
Aleanca, e cila ka shtatë deputetë në Kuvend, ka refuzuar të takohet me Kurtin për këtë çështje, pasi kishte paraqitur gjashtë kushte në këmbim të mbështetjes. Shefi i saj i Grupit Parlamentar, Besnik Tahiri, kritikoi mungesën e një procesi politik për zgjidhjen e çështjes së presidentit, ndërsa nga radhët e kësaj partie Kurti akuzohet se synimi i tij ka qenë shkuarja në zgjedhje.
Nëse afati kalon pa president, Kosova rrezikon zgjedhjet e katërta parlamentare që nga shkurti i vitit 2025.
Invalidët e UÇK-së, familjarët e dëshmorëve dhe të të zhdukurve, si dhe viktimat e dhunës seksuale gjatë luftës që jetojnë jashtë vendit lirohen nga tarifat për dokumente. Vendimi i MPJD-së është në fuqi që nga 14 tetori 2026.
