Termokosi ndez ngrohjen më 15 tetor, por tarifat e reja ende presin ZRRE-në

Radiatorët e mbi 25 mijë konsumatorëve të Termokosit në Prishtinë pritet të nisin të ngrohen më 15 tetor, në afatin e zakonshëm të fillimit të sezonit. Çmimi i ngrohjes për këtë dimër, megjithatë, nuk është vendosur ende: ndërmarrja publike pret që Zyra e Rregullatorit për Energji (ZRRE) të miratojë tarifat e reja.

Aferdita Uka, zëdhënëse e Termokosit, tha se përgatitjet për sezonin kanë përfunduar me kohë dhe se tani po kryhen testimet e fundit të pajisjeve. Gjatë verës, sipas saj, ekipet ndërhynë në rrjet kudo ku kishte pasur vështirësi në qarkullimin e ngrohjes sezonin e kaluar, duke pastruar pajisjet dhe duke zëvendësuar ventilet. Hapi i radhës është marrja e sasive të para të avullit nga KEK-u, mbi të cilin mbështetet prodhimi i energjisë ngrohëse.

"Tani jemi duke i realizuar testimet e fundit të këtyre pajisjeve para se të fillojmë marrjen e sasive të para të avullit nga KEK-u për të prodhuar energji ngrohëse dhe për ta shpërndarë atë tek mbi 25 mijë konsumatorë sa i kemi të kyçur aktualisht në rrjetin tonë të ngrohjes", tha Uka.

Ngrohja nuk do të arrijë menjëherë me fuqi të plotë. Furnizimi në ditët e para do të rritet gradualisht, me qëllim që sistemi të funksionojë pa ndërprerje dhe të shmangen dëmtimet teknike.

Rrjeti mbetet pika e ndjeshme. Ai shtrihet në 180 kilometra nëpër lagjet e Prishtinës dhe ka mbi 800 nënstacione në hyrjet e objekteve banesore. Uka tha se falë projekteve të realizuara deri tani gypat e vjetër janë zëvendësuar me gypa të rinj të parapërgatitur, por pranoi se me një shtrirje të tillë ndërmarrja "s'mund ta garantojmë se nuk do të ketë ndonjë problem teknik ndërkohë". Për çdo lagje ku kalon rrjeti, sipas saj, ka ekipe kujdestare që do të ndërhyjnë sa më shpejt në rast dëmtimi të gypave apo rrjedhjeje uji, për ta rikthyer furnizimin.

Për faturën, Termokosi ia lë fjalën rregullatorit. Uka shpjegoi se ZRRE është i vetmi autoritet që i përcakton tarifat, mbi bazën e raporteve periodike që ndërmarrja i dërgon, dhe se para çdo sezoni ngrohës njofton për pritjet e tarifave të reja. Ajo kujtoi se vitin e kaluar ngrohja ishte i vetmi shërbim që pati ulje tarifash, ndërkohë që energjia elektrike dhe uji u shtrenjtuan. "Neve vetëm na mbetet t'i aplikojmë ato. Po tash jemi pra në pritje të tarifave të reja", tha ajo.

Numri i konsumatorëve nuk pritet të rritet ndjeshëm këtë sezon. Sipas zëdhënëses, projektet e zgjerimit të rrjetit përfunduan vitin e kaluar, të financuara nga donatorë ndërkombëtarë dhe me një pjesëmarrje të dukshme nga mjetet vetanake të ndërmarrjes. Që nga mbyllja e sezonit të kaluar janë shqyrtuar vetëm kërkesa individuale të objekteve banesore ose institucioneve, aty ku kapaciteti termik e ka lejuar kyçjen.

Zgjerimi i madh pritet të vijë përmes projekteve kapitale, ndër të cilat Uka veçoi projektin "Solar 4 Kosovo". "Me projektin Solar 4 Kosovo ne do të përfitojmë mbi 8600 konsumatorë të rinj, dhe rrjeti ngrohës do të shpërndahet edhe nëpër lagje të tjera të qytetit të Prishtinës, ku deri tani nuk kanë qenë të përfshira në rrjetin e ngrohjes, pra", tha ajo.