Tërmeti më i fuqishëm i shekullit në Kolumbi: 265 të vdekur, kërkimet hyjnë në "fazën e fundit"

Tri ditë pas tërmetit shkatërrimtar që goditi Kolumbinë të hënën, kërkimet për të mbijetuar hynë në atë që autoritetet e quajtën "faza e fundit", ndërsa numri i të vdekurve u ngjit në 265 dhe mbi 3.500 persona të tjerë mbetën të plagosur.

Lëkundja me magnitudë 7,4 ishte tërmeti më i fuqishëm që ka goditur vendin në këtë shekull. Rreth 500 persona vazhdojnë të konsiderohen të zhdukur, sipas autoriteteve lokale, dhe më shumë se 9.550 shtëpi janë shkatërruar.

Të mërkurën, skuadrat e shpëtimit po i afroheshin me shpejtësi kufirit të 72 orëve nga momenti i tërmetit — periudha gjatë së cilës të mbijetuarit konsiderohen se kanë gjasat më të mëdha të gjenden ende gjallë nën ndërtesat e rrëzuara.

Dy nga qytetet më të goditura ishin Pereira, në zemër të rajonit të kafesë në Kolumbi, dhe Cali, qyteti i tretë më i madh i vendit, që raportuan përkatësisht 83 dhe 74 të vdekur.

"Po hyjmë në fazën e fundit", tha të mërkurën kryetari i bashkisë së Calit, Alejandro Eder. "Kjo nuk do të thotë se nuk do të ketë të mbijetuar më pas, por është më e vështirë."

Presidenti Abelardo de La Espriella, i cili u betua në detyrë vetëm tri ditë para se të godiste tërmeti, premtoi ngritjen e një fondi emergjence për të rindërtuar spitalet, shkollat, shtëpitë dhe infrastrukturën e shembur. "Kjo është pa dyshim një tragjedi me përmasa të jashtëzakonshme", u shpreh ai. "Përpjekjet tona janë përqendruar te ata që mbeten të zhdukur." De La Espriella shpalli gjithashtu gjendje emergjente ekonomike për të përballuar dëmet e shkaktuara nga tërmeti, pa specifikuar se çfarë masash do të përfshinte kjo.

Në Pereira, ekipet u përqendruan te një furrë buke e shembur, ku besohet se një shitës rruge i bllokuar që të hënën mund të jetë ende gjallë nën rrënoja. Me pajisje që zbulojnë dridhjet, shpëtimtarët thanë se kishin kapur shenja të mundshme jete nga Pablo Loaiza, çka i mblodhi familjarët e ankthshëm jashtë rrënojave.

"Na thonë se mund të jetë ai", i tha agjencisë AFP mbesa 16-vjeçare e tij, Sara Loaiza. "Zemra sikur do të më dalë nga kraharori." Familjarët thanë se i bllokuari dukej se u përgjigj kur shpëtimtarët i kërkuan të trokiste dy herë, e më pas tri herë nga poshtë rrënojave.

Shumë kolumbianë janë mobilizuar për të ndihmuar, duke sjellë ujë, ushqim e furnizime në lagjet e prekura, ndërsa jashtë qendrave të dhurimit të gjakut u formuan radhë të gjata.

Në Cali, ekipet e emergjencës u përgatitën të punonin edhe një natë të tretë me duar të zhveshura, vinça dhe qen gjurmues — duke u ndalur jo për të pushuar, por për të dëgjuar shenja jete. "Çdo gjysmë ore i bëjmë të gjithë të heshtin për të parë nëse gjejmë njerëz gjallë", i tha AFP-së shpëtimtarja vullnetare Johana Sanchez. "Deri tani, tre persona janë nxjerrë gjallë dhe tre të vdekur."