Tentuan t'i ndalonin veturën dhe qëlluan drejt shoferit: tre të arrestuar në Deçan

Ora ishte 05:15 e së enjtes, 22 tetor, kur një veturë në Deçan u kthye në shënjestër. Sipas Policisë së Kosovës, tre burra tentuan ta ndalonin automjetin dhe njëri prej tyre qëlloi me armë zjarri drejt shoferit.

Të tre, meshkuj kosovarë, janë arrestuar nën dyshimin për vrasje në tentativë. Policët kanë sekuestruar edhe një pistoletë që dyshohet se është përdorur në ngjarje.

"Lidhur me rastin e lartcekur janë arrestuar tre të dyshuar meshkuj kosovarë pasi që kishin tentuar ta ndalojnë veturën e ankuesit mashkull kosovar dhe njëri nga të dyshuarit kishte shtënë me armë zjarri në drejtim të ankuesit. Pistoleta që dyshohet se është përdorur në rast është sekuestruar", thuhet në raportin e policisë.

Prokurori ka vendosur që dy nga të dyshuarit të dërgohen në mbajtje, ndërsa i treti është liruar dhe rasti ndaj tij do të vazhdojë në procedurë të rregullt. Policia nuk ka bërë të ditur nëse shoferi ka marrë lëndime nga të shtënat.