Tentim vrasje apo frikësim? Supremja rrëzon dënimin për të shtënat me AK-47 në Kolovicë

A u shkrepën plumbat për të vrarë apo për të frikësuar? Sipas Gjykatës Supreme, gjykatat e shkallëve më të ulëta nuk i dhanë përgjigje të qartë kësaj pyetjeje. Për këtë arsye, dënimi ndaj F.D., të akuzuarit për tentim vrasje në rastin e njohur si të shtënat në Kolovicë, është rrëzuar.

Supremja aprovoi kërkesën për mbrojtje të ligjshmërisë të paraqitur nga mbrojtja e tij. Ajo anuloi aktgjykimet për tentim vrasje dhe armëmbajtje pa leje dhe e ktheu çështjen në rivendosje në Gjykatën Themelore në Prishtinë. Vendimi është përpiluar më 31 gusht 2026.

F.D. ishte dënuar fillimisht me 7 vjet e 10 muaj burgim. Gjykata e Apelit ia uli më pas dënimin në 5 vjet e 8 muaj. Me vendimin e ri, asnjë nga të dy aktgjykimet nuk mbetet në fuqi.

Supremja nuk vë në dyshim se të shtënat ndodhën dhe se i dëmtuari u plagos. Problemi, sipas saj, qëndron te rrethanat që duhej të përcaktonin qëllimin e të akuzuarit, të cilat mbetën të pasqaruara.

Një nga pikat më të dobëta të procesit ishte trajektorja e plumbit. Eksperti i balistikës nuk arriti të përcaktonte nëse i dëmtuari ishte goditur drejtpërdrejt apo nga një plumb rikoshet, pra një predhë e devijuar pasi ishte përplasur në një sipërfaqe tjetër. Supremja theksoi se gjykata nuk mund t'i zgjidhë vetë çështjet që kërkojnë njohuri profesionale. As prova në CD nuk u vlerësua e mjaftueshme për të treguar nëse arma ishte drejtuar ndaj të dëmtuarit apo në pjesën e poshtme të veturës.

Mangësi u gjetën edhe në mënyrën si u trajtua versioni i të akuzuarit. F.D. ka pretenduar se ishte ndjekur dhe kërcënuar nga i dëmtuari. Këtë pretendim e kishte mbështetur edhe i bashkakuzuari A.S., por sipas Supremes, shkalla e parë nuk e trajtoi deklaratën e tij siç duhej.

Gjykata e lartë e quajti gjithashtu të pamjaftueshëm përfundimin se i dëmtuari nuk kishte pasur armë vetëm sepse policia nuk gjeti një të tillë në veturën e tij. Në arsyetim përmendet edhe konstatimi për një vrimë depërtuese të predhës në veturën e të pandehurit.

Për të sqaruar rrethanat, Supremja kërkon rikonstruimin e vendit të ngjarjes. Dëmtimet në veturën e F.D. duhet të vlerësohen me ndihmën e ekspertit të komunikacionit.

Rasti lidhet me ngjarjen e 26 marsit 2024, rreth orës 13:50, në rrugën Haxhi Zeka në Prishtinë. Sipas aktakuzës, F.D. dyshohet se shtiu disa herë me një AK-47 nga brendia e një veture drejt automjetit që drejtonte N.B. Njëra nga predhat, sipas akuzës, e goditi shoferin dhe i shkaktoi lëndim të lehtë trupor.

Gjatë procesit, F.D. e pranoi fajësinë për armëmbajtje pa leje, por e kundërshtoi akuzën për tentim vrasje.