Tender 3 milionë euro për 6.46 km rrugë: në paketë edhe lidhja me Aeroportin e Prishtinës

Gjashtë kilometra e gjysmë asfalt, një afat dyvjeçar dhe rreth 3 milionë euro të parashikuara: këto janë kushtet e tenderit që Ministria e Infrastrukturës ka shpallur për rikonstruktimin e rrugës regionale R120, në segmentin Sllatinë-Magurë, dhe të rrugës që lidhet me Aeroportin Ndërkombëtar të Prishtinës.

Sipas dokumentacionit të tenderit, punimet në segmentin Sllatinë-Magurë shtrihen nga kilometri 0+000 deri në kilometrin 5+500. Pjesë e të njëjtit projekt është edhe rruga lidhëse me aeroportin, nga kilometri 0+000 deri në 0+960, pra një pjesë prej 960 metrash. Në total, projekti mbulon 6.46 kilometra rrugë.

Traseja nis në zonën kadastrale të Sllatinës së Madhe, në Komunën e Fushë Kosovës, dhe vazhdon në drejtim të Magurës. Kompania që do të shpallet fituese do të ketë 24 muaj kohë për ta përfunduar punën, sipas dosjes së tenderit.

Dokumenti teknik përcakton kërkesat për realizimin e punimeve, ndërsa operatori ekonomik i përzgjedhur do të jetë i obliguar t'i zbatojë punimet në përputhje me projektin dhe specifikimet teknike të përcaktuara nga Ministria e Infrastrukturës. Në dokumentacion kërkohet gjithashtu që, para fillimit të punimeve, kontraktuesi t'i verifikojë të dhënat e projektit dhe, në rast të ndonjë mospërputhjeje, të njoftojë menaxherin e projektit.

Vlera e parashikuar e projektit është rreth 3 milionë euro. Rikonstruktimi i këtij aksi pritet të përmirësojë qarkullimin në rrugën Sllatinë-Magurë dhe lidhjen rrugore drejt Aeroportit Ndërkombëtar të Prishtinës. Fituesi i tenderit nuk është përzgjedhur ende.