Të shtëna nga një automjet në Trappes: i dyshuari në paraburgim, prokuroria antiterror në alarm

Prokuroria Kombëtare Antiterror e Francës po e ndjek nga afër sulmin me armë zjarri në Trappes, në periferi perëndimore të Parisit, ku një person ka humbur jetën dhe katër të tjerë janë plagosur. Lajmin e dha kryeministri francez, Sébastien Lecornu, i cili konfirmoi gjithashtu se autori i dyshuar është kapur.

Në një postim në rrjetet sociale, Lecornu i cilësoi të shtënat si "ngjarje shumë të rënda" dhe shkroi se i dyshuari "është kapur dhe është vendosur në paraburgim policor". Sipas kryeministrit, prokuroria antiterror ka njoftuar se po e monitoron situatën, ndërsa motivi i sulmit nuk është bërë ende i ditur.

Një burim policor, i cituar nga agjencia AFP, tregoi se të premten një burrë hapi zjarr nga brenda një automjeti. Ai u arrestua më pas në Coignières, një qytet aty pranë, rreth orës 10:30 me orën lokale (08:30 GMT).

Bilanci mund të jetë më i rëndë se ai që është dhënë zyrtarisht. Mediat franceze raportojnë se numri i të plagosurve mund të jetë më i lartë dhe se mes tyre mund të ndodhet edhe një fëmijë 12-vjeçar, një e dhënë që autoritetet ende nuk e kanë konfirmuar.

Identiteti i të dyshuarit, gjendja e të plagosurve dhe rrethanat e sakta të sulmit nuk janë bërë publike nga autoritetet franceze.