Të shtëna në një shkollë fillore në Oregon: të paktën katër të vrarë, mes tyre tre fëmijë

Të paktën katër persona, mes tyre tre fëmijë, janë vrarë të enjten, më 15 tetor, në të shtëna brenda shkollës fillore Silver Rail në Bend, një qytet rural në shtetin amerikan të Oregonit, rreth 160 kilometra në juglindje të Portlandit. Bilanci është bërë i ditur nga zyrtarë të zbatimit të ligjit, të cituar nga televizionet amerikane CNN dhe CBS, sipas të cilëve viktimat janë tre fëmijë dhe një i rritur.

Policia e qytetit, nga ana e saj, ka folur zyrtarisht për "disa viktima" dhe ende nuk ka dhënë një shifër përfundimtare. Autori i të shtënave ka vdekur, por nuk është e qartë nëse ai është i përfshirë te katër të vdekurit e bilancit fillestar.

Alarmi u dha në orën 12:59 sipas orës lokale (19:59 GMT). Sipas Sheila Miller, menaxhere e komunikimit të Departamentit të Policisë së Bendit, thirrja e parë njoftonte për një të shtënë drejt një makine jashtë shkollës. Agjentët mbërritën në vendngjarje dy minuta më vonë. Kur arritën, i dyshuari ishte tashmë i vrarë me armë zjarri.

Kush e qëlloi sulmuesin mbetet pyetja kryesore e orëve të para. Miller tha se nuk e dinte nëse ishte policia apo një kalimtar që e neutralizoi. "Ende nuk e kemi konfirmimin e identitetit të personit që qëlloi të dyshuarin. Mund të jetë një kalimtar", deklaroi ajo në një konferencë për shtyp.

Në shkollë mësojnë midis 400 dhe 450 nxënës, sipas zëdhënëses së policisë. "E dimë që mes viktimave ka fëmijë", tha Miller. Ndërsa jepte deklaratat e para, ndërtesa ende po boshatisej: "Jemi aktualisht duke kaluar dhomë më dhomë dhe duke evakuuar secilin prej njerëzve që ndodhen në atë shkollë. Ky është lloji i gjërave që nuk duam kurrë të ndodhin në Bend. Është shkatërruese."

Autoritetet nuk e kanë konfirmuar numrin e të plagosurve. Sipas Miller, ekipet e urgjencës kanë transportuar të paktën dy persona në spital. "Nuk e dimë gjendjen e tyre", shtoi ajo.

Në hetim është përfshirë edhe Byroja Federale e Hetimeve (FBI). Drejtori i saj, Kash Patel, njoftoi në rrjetet sociale se agjentët federalë ndodhen në vendngjarje për të ndihmuar policinë lokale. "Do të vëmë në dispozicion çdo burim që u nevojitet", shkroi ai. Guvernatorja e Oregonit, Tina Kotek, deklaroi se po e ndjek nga afër situatën.

Senatori Jeff Merkley, që përfaqëson Oregonin në Senatin amerikan, ishte ndër politikanët e parë që shprehën ngushëllime. "Zemra ime është me komunitetin e Bendit dhe me të gjithë nxënësit dhe familjet e prekura. Askush nuk duhet të ketë frikë nga dhuna në shkollë", shkroi ai në platformën X.

Drejtuesi i sistemit shkollor të zonës, Steven Cook, iu drejtua komunitetit me një komunikatë: "Jemi të tronditur dhe thellësisht të pikëlluar nga kjo tragjedi e pakuptimtë. Ua shprehim ngushëllimet tona më të sinqerta familjeve dhe të gjithë personave të prekur nga ky akt dhune. Asnjë fjalë nuk mund të shprehë si duhet dhimbjen që ndjen komuniteti ynë."