Të shtëna në aheng familjar në Batllavë: dy në mbajtje, policia sekuestron tri armë

Tri armë zjarri, municion dhe gëzhoja: kjo është ajo që zyrtarët e stacionit policor në Podujevë sekuestruan pas ndërhyrjes në një aheng familjar në Batllavë, ku ishte raportuar për të shtëna me armë zjarri. Dy persona do të qëndrojnë 48 orë në mbajtje.

Policia e Kosovës bëri të ditur se pas ndërhyrjes tre persona u dërguan në stacion për t'u intervistuar. "Në këtë rast tre persona u shoqëruan në stacionin policor, njëri prej tyre u lirua pas intervistimit ndërsa dy të tjerët u dërguan në mbajtje", njoftoi policia.

Sipas policisë, rasti po trajtohet për vepra penale që lidhen me armëmbajtjen e paautorizuar dhe përdorimin e armës apo mjetit të rrezikshëm. Policia nuk ka bërë të ditur nëse dikush është lënduar gjatë të shtënave, ndërsa hetimet për zbardhjen e plotë të rrethanave të rastit vazhdojnë.