Të paktën 82 të vdekur në minierën e arit që u shemb në Kordofan të Sudanit

Minatorët gërmuan gjatë gjithë natës me duar dhe vegla të thjeshta. Në mëngjesin e të mërkurës, nga rrënojat e minierës artisanale të arit Al-Zaraa, në Al-Nahud të regjionit të Kordofanit në Sudan, ishin nxjerrë 60 trupa, sipas Khair Al-Sayyed Jabara, një i mbijetuar që u kyç në operacionet e shpëtimit bashkë me minatorë të tjerë.

Bilanci i deklaruar është të paktën 82 të vdekur dhe 52 të plagosur. Informacionin e dha një burim brenda Forcave të Mbështetjes së Shpejtë (FSR), formacioni paramilitar që kontrollon regjionin, i cili foli nën kushtin e anonimatit. "Mbetet një numër i papërcaktuar personash të bllokuar nën rrënoja dhe operacionet e shpëtimit po zhvillohen me mjete rrethanore", thuhet në deklaratën e tij.

Miniera u shemb të martën. Sipas Al-Amin Suleiman, një minator që ndodhej në vendin e ngjarjes në momentin e shembjes, arkitektura e këtyre puseve e shumëfishon katastrofën: "Këtu puset janë të gjitha njëri pranë tjetrit. Nëse një prej tyre shembet, shembet edhe gjithë të tjerat përreth". Sipas tij, "kjo është ajo që ndodhi" të martën.

Shembja ndodhi në një vend ku ari është bërë njëkohësisht shpresë dhe rrezik. Prej fillimit të konfliktit, në prill 2023, që përball ushtrinë sudaneze me FSR, të dyja kampet kanë fituar nga burimet e vendit, veçanërisht nga tregtia e arit, e vlerësuar në miliarda dollarë. Në një vend ku sipas Organizatës së Kombeve të Bashkuara gati 20 milionë njerëz ndodhen tashmë në pasiguri akute ushqimore, shumë të rinj u hodhën në një garë të rrezikshme për ar, kryesisht në miniera artisanale si kjo që u rrënua.

Pjesa më e madhe e arit që nxirret në Sudan vjen nga këto eksploatime informale dhe aksidentet janë të shpeshta, për shkak të instalimeve të pasigurta dhe mungesës së masave të mbrojtjes. Minatorët punojnë me duar, me vegla rrethanore, për paga ditore të mjera, dhe manipulojnë produkte toksike si cianuri për të nxjerrë arin, çka shkakton sëmundje në zonat përkatëse.

Sudani, vendi i tretë më i madh i Afrikës për sipërfaqe, është ndër prodhuesit kryesorë të arit në kontinent. Kompania publike Sudanese Mineral Resources Company raportoi në 2025 një "nivel rekord prej pesë vitesh", me 70 tonë të prodhuara.

Në korrik, Britania e Madhe dhe Evropa shpallën sanksione kundër tregtisë së arit sudanez, me qëllim kufizimin e burimeve të financimit të konfliktit. Ministria britanike e Punëve të Jashtme e vlerësoi atëherë këtë tregti në disa miliarda dollarë dhe vlerësoi se ajo ndihmonte financimin e "blerjes së armëve dhe aktiviteteve të grupeve të armatosura".

Sipas zyrtarëve sudanezë dhe burimeve brenda industrisë minerare, thuajse i tërë ari që del nga Sudani, nëpër kanalet zyrtare ose nëpër rrjetet paralele, përfundon në Emiratet e Bashkuara Arabe, të cilat akuzohen se armatosin paramilitarët, akuzë që Abu Dhabi e mohon, pavarësisht provave të paraqitura në raporte të shumta ndërkombëtare.