Tarifa e mbeturinave në Vushtrri nga 6 në 10 euro: Idrizi merr mbi vete koston politike

Katër euro më shumë për çdo ekonomi familjare: tarifa e mbeturinave në Vushtrri është ngritur nga 6 në 10 euro. Vendimi ka hapur debat në qytet, mes një kryetari që e paraqet si investim te punëtorët e pastrimit dhe qytetarëve që e shohin si barrë të re mbi buxhetin e familjes.

Kryetari i Komunës së Vushtrrisë, Ferit Idrizi, e mbron rritjen me argumentin e kushteve të punëtorëve që mbledhin mbeturinat dhe pastrojnë qytetin. Sipas tij, kjo kategori është neglizhuar për sa u përket pagave dhe kushteve të punës.

"Qëllimi i rritjes së taksës së mbeturinave është përmirësimi i kushteve të punëtorëve të pastrimit. Këta punëtorë janë lënë pas dore, i kryejnë punët më të vështira dhe janë ndër më të merituarit në shoqëri", deklaroi Idrizi.

Kryetari e lidh vendimin edhe me një problem praktik: mungesën e fuqisë punëtore. Ai tha se rritja e kostove të naftës dhe e shërbimeve të tjera e ka vështirësuar funksionimin e kompanive dhe gjetjen e punëtorëve të mjaftueshëm. Idrizi përmendi mundësinë që pagat e punëtorëve të pastrimit të arrijnë 800 deri në 900 euro, duke theksuar se puna e tyre mbart rreziqe, përfshirë ekspozimin ndaj mbeturinave dhe rrezikun e infeksioneve.

"Le të shkojë paga e tyre deri në 800 apo 900 euro, ta dimë që me të vërtetë po kujdesemi për këtë kategori", tha ai.

Për ta zbutur reagimin e qytetarëve, Idrizi bëri një krahasim: e shpërndarë në ditë, sipas tij, tarifa e mbeturinave është kosto relativisht e vogël krahasuar me shpenzimet për telefoninë, internetin apo produktet e tjera të konsumit. Ai shtoi se familjet në gjendje të rëndë sociale lirohen nga pagesa.

Vendimi ka hasur kritika edhe nga disa anëtarë të Kuvendit Komunal. Idrizi i kundërshtoi ato dhe deklaroi se është i gatshëm ta bartë vetë koston politike të vendimit, nëse e konsideron atë në interes të punëtorëve dhe të shërbimeve publike.

"Unë nuk kam kërkuar të rritet paga ime, kam kërkuar të rritet paga e punëtorëve që punojnë dhe e kanë mbajtur qytetin pastër", tha kryetari, duke përmendur punën e tyre gjatë gjithë vitit në mirëmbajtjen e rrugëve dhe hapësirave publike, si dhe në kujdesin për gjelbërimin dhe lulet e qytetit.

Në rrugët e Vushtrrisë, megjithatë, llogaria duket ndryshe. Qytetari Vedat Krasniqi e quan rritjen të papërballueshme për familjet, në një kohë kur edhe shpenzimet e tjera mujore janë rritur.

"Edhe 6 euro kanë qenë një shpenzim që e kemi paguar çdo muaj, ndërsa tash me 10 euro është edhe më e rëndë për familjet. Janë rritur çmimet e rrymës, naftës dhe pothuajse të gjitha produkteve të konsumit të përditshëm. Nuk mund të arsyetohet çdo rritje duke thënë se duhet të paguhen më mirë punëtorët. Natyrisht që ata duhet të kenë paga më të mira, por duhet të shohim edhe gjendjen e qytetarëve dhe mundësinë e tyre për t’i përballuar këto shpenzime", tha ai.