Tarifa deri në 100%: Kongresi amerikan drejt miratimit të ligjit të sanksioneve ndaj Rusisë

Nafta ruse mund t'i kushtojë shumë shtrenjtë Pekinit dhe Nju Delhit. Dhoma e Përfaqësuesve e Shteteve të Bashkuara pritet të miratojë të mërkurën pasdite një ligj të gjerë sanksionesh ndaj Rusisë, hap që do ta dërgonte tekstin drejtpërdrejt në tavolinën e presidentit Donald Trump.

Projektligji mban titullin "Lindsey O. Graham Sanctioning Russia and Iran Act of 2026" dhe u propozua më shumë se një vit më parë nga senatori i ndjerë republikan i Karolinës së Jugut, Lindsey Graham. Objektivi i tij është ekonomia ruse, si ndëshkim për pushtimin e plotë dhe të vazhdueshëm të Ukrainës.

Zemra e ligjit është instrumenti tarifor. Teksti do t'i lejonte Trumpit të vendosë tarifa deri në 100 për qind ndaj vendeve që bëjnë pjesë në pesë blerësit më të mëdhenj të naftës bruto ose gazit rus, mes tyre Kina dhe India. Të ardhurat nga shitja e naftës janë thelbësore për financimin e përpjekjes ushtarake ruse. Përveç tarifave, ligji parashikon sanksione ndaj drejtuesve, zyrtarëve dhe institucioneve financiare ruse, si edhe zgjerimin e sanksioneve ndaj Iranit.

Senati e kaloi tekstin muajin e kaluar me një votim dërrmues, 86 vota pro dhe 11 kundër, me përkrahje të fortë dypartiake.

Kundërshtimi vjen nga një grup demokratësh në Dhomë, që thonë se ligji i jep presidentit shumë kompetenca tarifore. Përfaqësuesit Gregory Meeks (demokrat nga Nju Jorku), Don Beyer (demokrat nga Virxhinia) dhe Richard Neal (demokrat nga Masaçusetsi) deklaruan javën e kaluar në një qëndrim të përbashkët se, ndonëse demokratët e Dhomës e mbështetin fuqishëm Ukrainën, ky projektligj do të bëjë "më shumë dëm se dobi".

"Këtë projektligj do të zgjeronte në mënyrë dramatike kompetencat presidenciale tarifore, ndërkohë që nuk arrin t'i bëjë të detyrueshme sanksionet ndaj Rusisë, dhe të dyja këto janë të papranueshme. Këto mangësi do të rrisin çmimet për amerikanët, duke minuar njëkohësisht mbështetjen për Ukrainën në afat të gjatë", thanë tre ligjvënësit.

Nëse Dhoma e miraton, ligji shkon për nënshkrim në Shtëpinë e Bardhë. Rezultati i votimit të pritur nuk dihet ende.