Tanja Vujoviq nënkryetare e Kuvendit, me votat e Vetëvendosjes

Vota që e çoi një deputete serbe në krye të tavolinës së kryesisë së Kuvendit të Kosovës erdhi nga një drejtim jo i zakonshëm: nga Lëvizja Vetëvendosje. Tanja Vujoviq u zgjodh nënkryetare e Kuvendit pasi bashkëpartiakët e saj nga Lista Serbe nuk arritën t'i siguronin votat e nevojshme, dhe boshllëku u mbush nga deputetët e VV-së.

Vujoviq është dekane e Universitetit të Mitrovicës së Veriut, një institucion që funksionon sipas sistemit të Serbisë dhe të cilit serbët i referohen si universiteti "me seli të përkohshme në Mitrovicë".

Emri i saj nuk është i panjohur në debatin publik. Vujoviq ka folur disa herë për pozitën "jashtëzakonisht të vështirë" të serbëve në Kosovë, dhe në mars të këtij viti, në një deklaratë për televizionin serb TV Prva, e krahasoi gjendjen e tyre me periudhën e Perandorisë Osmane.

"Çdokush duhet të jetë i vetëdijshëm se pozita e serbëve në këto zona është jashtëzakonisht e vështirë dhe mund të krahasohet me periudhën e Perandorisë Osmane, kur serbët paguanin taksa dhe haraçe të ndryshme. Nuk e teproj kur them se situata është e ngjashme edhe sot, duke pasur parasysh se po dëshmojmë arrestime të fëmijëve nga Policia e Kosovës për shkak të këngëve serbe ose bluzave me mbishkrime serbe, si dhe faktin se kemi njerëz të dënuar padrejtësisht në burgjet e Prishtinës", tha ajo.

Po në mars, Vujoviq u shpreh se Ligji për të Huajt i miratuar nga Qeveria e Kosovës "do të sigurojë vazhdimin e funksionimit të institucioneve brenda sistemit të Serbisë". "Ne e dimë se çfarë po mbrojmë dhe nuk do të heqim dorë nga kjo luftë", deklaroi ajo.

Zgjedhja e saj vjen në kuadër të konstituimit të Kuvendit, procesi i të cilit vazhdon me hapin tjetër: Lëvizja Vetëvendosje e ka propozuar Albin Kurtin për mandatar për formimin e Qeverisë.