Sulmi në Vushtrri: Një muaj paraburgim për N.M., dy të dyshuar në arrati

Dy persona të dyshuar për sulmin e 30 shtatorit në Vushtrri ende nuk janë në duart e drejtësisë. I treti, i identifikuar me inicialet N.M., do të qëndrojë një muaj në paraburgim, i dyshuar për vrasje në tentativë.

Masën e ka konfirmuar zëdhënësja e gjykatës, e cila ka sqaruar edhe veprat penale për të cilat dyshohet i pandehuri: "Të pandehurit N.M. i është caktuar masa e paraburgimit në kohëzgjatje prej 30 (tridhjetë) ditësh, për shkak të dyshimit të bazuar për kryerjen e veprave penale Vrasje në tentativë nga neni 172 lidhur me nenin 28 dhe 31 të KPRK-së, dhe veprës penale Mbajtja në pronësi, kontroll ose posedim të paautorizuar të armëve, neni 366, paragrafi 1, të KPRK-së".

Paraburgimi zgjat nga 7 tetori deri më 7 nëntor 2026. Ndërkohë, Prokuroria Themelore në Mitrovicë, në një përgjigje me shkrim, ka bërë të ditur se dy të dyshuarit e tjerë të lidhur me rastin gjenden në arrati.

Sipas Policisë së Kosovës, viktima, një burrë, dyshohet se u sulmua nga disa persona të panjohur, të cilët e rrahën me mjete të forta. Pas sulmit, ai mori trajtim mjekësor në Qendrën Klinike Universitare të Kosovës (QKUK).

Në vendin e ngjarjes, policia gjeti një veturë të aksidentuar, katër gëzhoja dhe një karikator me pesë fishekë, si dhe një fishek tjetër brenda veturës.