Sulm në një shkollë të mesme në Suedi: dy të plagosur rëndë, sulmuesi i arrestuar

Frikë dhe panik në një shkollë të mesme në qytetin suedez të Fagerstas, ku dy persona mbetën të plagosur rëndë gjatë një sulmi. Sulmuesi u arrestua, sipas një njoftimi të publikuar në faqen zyrtare të komunës së Fagerstas, ku ndodhet shkolla.

Ngjarja u shoqërua me momente ankthi për familjet. Nxënësit qëndruan për një kohë të mbyllur brenda ndërtesës dhe filluan të dilnin vetëm më vonë, ndërsa shumë prindër nuk arritën të viheshin në kontakt me fëmijët e tyre.

Policia qëlloi sulmuesin, duke e goditur në një këmbë, sipas raportimeve të mediave.

Një nxënës i shkollës përshkroi para transmetuesit publik suedez Svt momentin e sulmit. "Sulmuesi erdhi nga pas njërit prej shokëve tanë dhe e goditi në krah, i cili ishte i mbuluar me gjak. Pastaj dikush thirri policinë dhe të gjithë filluam të vraponim sepse kishim frikë", tha Abdulrahem Salmo, i intervistuar nga Svt.

Rrethanat e plota të sulmit, si dhe identiteti dhe motivi i personit të arrestuar, ende nuk janë bërë të ditura.