Sulm me shpatë në një shkollë suedeze: disa të plagosur, një person i arrestuar

Një person i armatosur me shpatë hyri të mërkurën në një shkollë në qytetin Fagersta, në veriperëndim të Stokholmit, dhe plagosi disa persona, ndërsa policia suedeze nisi një operacion të gjerë në terren.

Sipas komunës së Fagerstas, sulmuesi hyri në ambientet e shkollës dhe lëndoi disa persona, por më pas u vu nën kontroll. Policia bëri të ditur në një deklaratë të shkurtër se doli në vendngjarje për atë që e konsideroi një ngjarje të rrezikshme për jetën ende në zhvillim. Autoritetet konfirmuan se një person është arrestuar dhe u kërkuan qytetarëve të qëndrojnë pas kordonit të sigurisë.

Në vend u panë forca të shumta të shërbimeve emergjente, si dhe njësia speciale e reagimit e policisë suedeze. Sipas komunës, nxënësit në të gjitha shkollat e Fagerstas u mbyllën brenda objekteve për arsye sigurie.

Numri i saktë i të plagosurve dhe rrethanat që çuan te sulmi ende nuk janë bërë të ditura nga autoritetet.