Sulm kibernetik godet Institutin Kroat të Pensioneve — pagesat mbeten të paprekura

Instituti Kroat i Sigurimit Pensional (HZMO) njoftoi se më 19 gusht u regjistrua një sulm kibernetik ndaj aplikacionit "HZMO Live - qendra për shfrytëzuesit", platforma që shërben për pranimin dhe përgjigjen e kërkesave të qytetarëve.

Sipas institutit, sistemi bazë informatik nuk u prek nga sulmi. "Shërbimet përgjegjëse të HZMO-së, menjëherë pas konstatimit të aktiviteteve tipike për një sulm kibernetik, aktivizuan procedurat e parashikuara të sigurisë dhe forenzikës. Sipas gjetjeve të deritanishme, sistemi bazë informatik i HZMO-së nuk është prekur nga ky incident", thuhet në njoftimin e institutit.

Instituti bëri të ditur se po zhvillohet një analizë e detajuar forenzike e incidentit. "Është në vazhdim një analizë e detajuar forenzike e incidentit dhe po ndërmerren masat e nevojshme të sigurisë me qëllim përcaktimin e të gjitha rrethanave të ngjarjes dhe rivendosjen e sigurt të punës së aplikacionit të lartpërmendur", njoftoi HZMO.

Instituti theksoi se proceset e punës vazhdojnë pa pengesa dhe se pagesa e pensioneve, si dhe realizimi i të gjitha të drejtave që siguron ai, nuk janë vënë në pikëpyetje.

Autoritetet paralajmëruan se do të japin informacione të reja për zhvillimin e situatës. "Për rrjedhën e ngjarjeve do të raportojmë me kohë, ndërsa informacionet e reja do të pasojnë më së voni nesër deri në mesditë", u tha nga HZMO.