Suedia me ambasadore të re në Kosovë: Haxhiu pranon letrat kredenciale të Asa Pehrson

Kosova ka një ambasadore të re të Suedisë. Të martën, më 18 gusht 2026, presidentja në detyrë, Albulena Haxhiu, ka pranuar letrat kredenciale të ambasadores së re të Mbretërisë së Suedisë në Kosovë, Asa Pehrson, akt që shënon nisjen zyrtare të mandatit të saj diplomatik në Prishtinë.

Në një postim në Facebook, Haxhiu ka bërë të ditur se gjatë ceremonisë ka vlerësuar mbështetjen e vazhdueshme që Suedia i ka dhënë Kosovës ndër vite. Sipas njoftimit, gjatë takimit është ritheksuar gatishmëria e Kosovës për të thelluar më tej bashkëpunimin me Suedinë në fusha me interes të përbashkët.

“Ambasadores Pehrson iu urua sukses në misionin e saj të ri diplomatik, me shpresën se gjatë mandatit të saj do të kontribuojë në forcimin e mëtejshëm të marrëdhënieve ndërmjet Kosovës dhe Suedisë”, thuhet në postimin e Haxhiut.

Në mbyllje të ceremonisë, ambasadores së re suedeze i është uruar mirëseardhje dhe një qëndrim sa më i këndshëm në Republikën e Kosovës.