Stuhi, tornado dhe 21 mijë rrufe: moti i keq godet veriun e Italisë, mbi 350 të evakuuar

Një valë e furishme moti të keq ka goditur qendrën dhe veriun e Italisë, duke lënë pas vetes përmbytje, rrëshqitje dheu, ura e rrugë të dëmtuara dhe komuna të tëra të izoluara. Stuhitë e dendura, tornadot dhe një sasi e pazakontë rrufesh ranë mbi rajonet Lombardi, Piemont, Liguria, Toskanë, Veneto dhe Emilia-Romanja, duke detyruar evakuimin e më shumë se 350 personave vetëm në Lombardi.

Rajoni më i prekur është Lombardia. Guvernatori i saj, Attilio Fontana, njoftoi se do të kërkojë shpalljen e gjendjes së jashtëzakonshme. Sipas tij, ministri i Mbrojtjes Civile, Nello Musumeci, ka garantuar se do ta paraqesë kërkesën e Lombardisë para Këshillit të Ministrave sapo të jetë e mundur. Vetëm në këtë rajon zjarrfikësit kryen 400 ndërhyrje nga afro një mijë të tilla në total në të gjithë vendin.

Situatat më të rënda regjistrohen në zonën e Brescias, veçanërisht në Val Camonica, në zonën e Bergamos me gjashtë fshatra të izoluar, dhe në provincën e Sondrios. Në Sonico, në provincën e Brescias, 57 persona u evakuuan të enjten në mbrëmje dhe u strehuan në sallën polifunksionale e në ish-shkollën fillore të lagjes Garda. Në Vione numërohen 70 të evakuuar. Në Ponte di Legno tragjedia u shmang për pak: një rrufe goditi qendrën e kabinovisë, por nuk pati asnjë të lënduar. Në provincën e Bergamos, 60 nga 250 personat e evakuuar të enjten nga kampingu i Isola di Fondrës po flenë në dy palestra, ndërsa 180 të tjerët shkuan te të afërm ose miq.

Në Piemont, ku të enjten ra një shakullimë, zjarrfikësit kryen 260 ndërhyrje në provincat e Torinos, Novarës, Vercellit dhe Alessandrias për përmbytje, rrëzime pemësh dhe dëmtime çatish. Një nga vendet më të goditura ishte Chivasso, në provincën e Torinos, ku një mur i vogël u shemb mbi disa automjete të parkuara.

Në Liguria, shtrëngata, breshër, erëra të forta dhe rrufe përshkuan rajonin nga perëndimi në lindje. Në Rapallo, një tornado në grykëderdhjen e lumit Boate shkaktoi dëme të shumta. Për shkak të rrëzimit të pemëve, dy segmente të rrugës shtetërore Aurelia u mbyllën përkohësisht për qarkullim, si në provincën e Xhenovës, ashtu edhe në atë të La Specias.

Toskana u përfshi nga rrufetë — vlerësohen rreth 21 mijë — dhe nga stuhitë. Pemë e degë të rrëzuara kudo dhe ndërprerje të shumta të energjisë elektrike shkaktuar nga rënia e drurëve për shkak të erës. Në Pescia u shemb një pjesë e murit të stadiumit. Qindra abonentë të kompanisë Enel mbetën pa dritë dhe pa internet në San Casciano Val di Pesa. Në Firence u ndërpre linja T2 e tramvajit Peretola-sheshi San Marco në zonën e stacionit të Santa Maria Novellës, si dhe qarkullimi hekurudhor në linjën Firence-Borgo-San Lorenzo-Faenza. Në Lunixhana, zjarrfikësit shpëtuan tre persona që kishin mbetur nën një rrëshqitje dheu në Bagnone, në Massa Carrara. Në rajonin e Markes, në Sant'Elpidio a Mare, çatia e një ndërtese u shkëput dhe disa tjegulla goditën automjete të parkuara.