Studentët e Prishtinës në marsh më 21 shtator: memorandum me gjashtë pika për Hagën

Kolona do të niset nga Qendra e Studentëve në orën 11:30 dhe do të ndalet te sheshi "Skënderbeu", ku në orën 12:00 do të mbahen fjalimet. Parlamenti Studentor i Universitetit të Prishtinës e ka caktuar marshin paqësor për 21 shtator, si shprehje kundërshtimi ndaj vendimit të Gjykatës Speciale në Hagë ndaj ish-krerëve të Ushtrisë Çlirimtare të Kosovës.

Në fund të marshit do të lexohet një memorandum me gjashtë pika, i përgatitur nga studentët e Universitetit të Prishtinës së bashku me kolegë nga universitete të tjera publike dhe private. Sipas Flon Kastratit nga Parlamenti Studentor, dokumenti do të publikohet posa të përfundojë tubimi. Kastrati tha se marshi është organizuar si thirrje për unitet, dinjitet dhe solidaritet, dhe se thirrja publike për pjesëmarrje ishte bërë që të premten, për ditën e hënë.

Donart Humolli nga Parlamenti Studentor e cilësoi të padrejtë vendimin ndaj ish-krerëve të UÇK-së dhe kërkoi mbështetje për ta deri në përfundimin e procesit gjyqësor. Ai kërkoi mbështetje financiare të pakushtëzuar, si dhe mbështetje të plotë politike e morale për të akuzuarit.

Humolli u bëri thirrje partive politike që të gjejnë gjuhën e bashkëpunimit dhe ta vendosin unitetin mbi interesat ditore. Ai kërkoi gjithashtu që organizatat ndërkombëtare të të drejtave të njeriut të bëjnë hetim dhe monitorim të detajuar të procesit gjyqësor në Hagë, ndërsa ftoi aktorët rinorë, përfaqësuesit e rinisë dhe organizatat rinore, në nivel rajonal dhe evropian, të koordinohen përmes një strategjie të përbashkët.

Marshi i studentëve vjen pas një vale reagimesh e protestash në kryeqytet ndaj vendimit të Gjykatës Speciale, gjykatë me seli në Hagë që merret me akuzat kundër ish-krerëve të UÇK-së.