Spiunazh për BIA-n: i dënuari me 6 vjet thotë në Apel se punonte për AKI-në

"Kam kënaqësinë që kam punuar për AKI-në, po pse në burg?" Me këtë pyetje, H.S., i dënuar në shkallë të parë me gjashtë vjet burgim për spiunazh në favor të shërbimit sekret serb BIA, u paraqit para Gjykatës së Apelit. Mbrojtja e tij mbështetet te një pretendim i vetëm: ai thotë se nuk ka punuar për Beogradin, por për Agjencinë Inteligjente të Kosovës (AKI).

Para trupit gjykues, ai pohoi se çdo lëvizje drejt Serbisë e ka bërë nën urdhrat e zyrtarëve të AKI-së, të cilëve, sipas tij, u raportonte më pas. Ai tha se ka dy dëshmitarë, punonjës të agjencisë me të cilët kishte bashkëpunuar, dhe i kërkoi gjykatës t'i dëgjojë dëshmitë e tij. "Jam plotësisht i pafajshëm", deklaroi ai, duke shtuar se zyrtarët e AKI-së e paguanin çdo muaj dhe se "jam kordinu me ta në mëngjes m'i kanë dhanë pajisjet e përgjimit dhe më kanë udhëzu qysh me vepruar e çka me fol". Ai pretendoi gjithashtu se, me marrëveshje, gjysma e rrogës që merrte nga AKI i është paguar bashkëshortes së tij, ndërsa ai ka heshtur.

Aktgjykimi i shkallës së parë kundërshtohet nga të dyja palët. Prokuroria Speciale e Kosovës (PSRK) është ankuar duke kërkuar rritjen e dënimit, ndërsa avokati mbrojtës kërkon që i mbrojturi i tij të lirohet ose që çështja të kthehet për rivendosje.

Akuza e prokurorisë përshkruan një bashkëpunim që zgjat mbi pesëmbëdhjetë vjet. Sipas aktakuzës së ngritur më 11 shtator 2025, H.S. ka qenë i rekrutuar nga BIA serbe që nga nëntori i vitit 2009 e deri në arrestimin e tij nga autoritetet e Kosovës, më 6 maj 2025. Gjatë kësaj kohe, sipas PSRK-së, ai ka mbledhur dhe ka dorëzuar informacione për radikalizmin fetar në Kosovë, për krerët e UÇK-së, për numrin e personave që morën pjesë në ISIS dhe për ata që u kthyen nga luftërat në Siri, nën direktivën e agjentëve serbë që e kishin rekrutuar dhe për shuma të ndryshme parash. Prokuroria pretendon se ai ishte pajisur me tre telefona të mençur dhe mjete financiare, se i ishte premtuar blerja e një shtëpie dhe se paguhej 700 euro në muaj.

Një nga pikat më të rënda të aktakuzës lidhet me Sirinë. Sipas prokurorisë, ai shkoi atje për t'iu bashkuar ISIS-it me mision nga BIA serbe, për të mbledhur të dhëna për numrin e shqiptarëve në radhët e organizatës dhe për vendet ku ata vepronin. Pas kthimit ai u dënua për pjesëmarrje në organizatën terroriste ISIS, por, sipas PSRK-së, vazhdoi takimet me zyrtarë të drejtorisë së BIA-s për terrorizmin në pjesë të ndryshme të Serbisë, duke dhënë informacione për personat e radikalizuar, rrymat vehabiste dhe mesxhidet në Kosovë.

Vetë AKI-ja, agjencia për të cilën i akuzuari thotë se punonte, i ka konfirmuar prokurorisë se personi me të cilin ai takohej është shef për luftimin e terrorizmit në kuadër të BIA-s. Si prova, PSRK ka paraqitur raportin e hyrje-daljeve të tij në kufirin Kosovë-Serbi dhe materiale nga masat e fshehta, ku ai shihet duke u takuar me zyrtarë të shërbimit serb.