Speciale cakton tre gjyqtarët e Apelit për dënimin e ish-krerëve të UÇK-së

Michèle Picard, Kai Ambos dhe Nina Jørgensen janë tre gjyqtarët që do të marrin në dorë fazën e Apelit në çështjen e dënimit të ish-krerëve të UÇK-së para Dhomave të Specializuara të Kosovës.

Trupin Gjykues të Apelit e caktoi më 22 shtator Presidentja e Dhomave të Specializuara, gjyqtarja Ekaterina Trendafilova. Këtë e bëri të ditur vetë gjykata në një përgjigje për Gazetën Express.

Çështja e parë mbi tavolinën e trupit të ri është procedurale, por me peshë: ekipet e mbrojtjes kanë kërkuar zgjatjen e afatit për paraqitjen e njoftimit për apel. Sipas Dhomave të Specializuara, të njëjtët gjyqtarë do të vendosin edhe për të gjitha parashtresat e cilësdo palë që lidhen me një njoftim për apel kundër Aktgjykimit të Gjykimit në këtë çështje.

"Trupi Gjykues përbëhet nga gjyqtarët Michèle Picard, Kai Ambos dhe Nina Jørgensen", thuhet në përgjigjen e gjykatës.

Gjykata shpjegon edhe logjikën e zgjedhjes. Trendafilova, sipas saj, u mbështet në kriteret e Rregullës 4 të Rregullores për Caktimin e Gjyqtarëve, "përfshirë përvojën dhe ekspertizën përkatëse, si dhe disponueshmërinë e gjyqtarëve në këtë kohë".