SPAK sekuestron 77 milionë lekë: 25 makina dhe tokë në Sharrë nga rrjeti i kokainës

Pasuri me vlerë 77 milionë lekë janë vënë nën sekuestro në Shqipëri, në kuadër të hetimit për një organizatë kriminale që, sipas Prokurorisë së Posaçme kundër Korrupsionit dhe Krimit të Organizuar (SPAK), organizonte dërgesa shumëtonëshe kokaine nga Amerika Latine drejt porteve kryesore të Bashkimit Evropian, përfshirë Hamburgun dhe Anversin.

Masa u vendos nga Gjykata e Posaçme e Shkallës së Parë me vendimin nr. 667, të datës 14 tetor 2026, e cila caktoi "sekuestro preventive" mbi pasuri të luajtshme dhe të paluajtshme në emër të dy shtetasve, të identifikuar me inicialet A.Ç. dhe F.C. SPAK e bëri publik vendimin më 22 tetor.

Në emër të A.Ç. është bllokuar një parcelë toke në Sharrë të Tiranës, me sipërfaqe 2000 metra katrorë, e regjistruar si "Tokë Arë" (pasuria nr. 349/47, zona kadastrale 3321), e cila figuron në pronësi edhe të një shtetaseje me të njëjtat iniciale. Në emër të F.C. janë sekuestruar 100 për qind e kuotave të shoqërisë tregtare "Check Company Sh.p.k", me seli në rrugën e Dibrës në Tiranë. Kjo kompani zotëron, sipas prokurorisë, 24 automjete Volkswagen dhe një Toyota.

Sekuestroja është rezultat i një hetimi pasuror që SPAK e ka zhvilluar paralelisht me procedimin penal nr. 187 të vitit 2023. Sipas prokurorisë, ky hetim identifikoi pasuri që përbëjnë produkte të veprimtarisë kriminale, të regjistruara në emër të personave nën hetim dhe të familjarëve të tyre.

Procedimi ka të bëjë me veprat penale të parashikuara nga nenet 283/a, 287, 333/a dhe 334 të Kodit Penal: trafik i lëndëve narkotike, pastrim i produkteve të veprës penale, grup i strukturuar kriminal dhe kryerje e veprave penale nga organizata kriminale dhe grup i strukturuar kriminal. Në listën e personave nën hetim figurojnë 16 shtetas, të identifikuar vetëm me inicialet, disa prej tyre edhe me pseudonime. Ndaj 16 personave janë caktuar masa të sigurimit personal.

Sipas SPAK, organizata kishte shtrirje të gjerë ndërkombëtare dhe bashkëpunonte me grupe të tjera kriminale për të lehtësuar transportin e drogës drejt porteve evropiane, ndërsa fitimet e mëdha i investonte në prona dhe biznese, si në Shqipëri, ashtu edhe jashtë saj.

Hetimi u mbështet në analizën e komunikimeve të enkriptuara të platformës SkyECC dhe u zhvillua në bashkëpunim intensiv me EUROPOL-in, si dhe me autoritetet e Belgjikës, Francës, Holandës, Gjermanisë dhe Italisë. Prokuroria thotë se janë evidentuar rolet e secilit anëtar të grupit dhe është dokumentuar i gjithë zinxhiri i transferimit të parave të përfituara nga aktiviteti kriminal. Për ecurinë e mëparshme të çështjes, SPAK u referohet gazetarëve edhe njoftimit të saj të 8 gushtit 2025.

Sekuestroja preventive është masë sigurimi dhe jo konfiskim përfundimtar. Vetë prokuroria e kujton në njoftimin e saj: "Çdo person prezumohet i pafajshëm derisa nuk vërtetohet fajësia e tij me vendim gjyqësor të formës së prerë."