Sokol Sadushi ia dorëzon Ilir Pandës drejtimin e Gjykatës së Lartë pas gjashtë vitesh

Gjykata e Lartë e Shqipërisë ka një kryetar të ri. Sokol Sadushi ia dorëzoi zyrtarisht detyrën Ilir Pandës të premten, në një ceremoni të zhvilluar në Sallën e Kolegjeve të Bashkuara në Tiranë, në praninë e gjyqtarëve, këshilltarëve ligjorë dhe stafit administrativ të gjykatës.

Me këtë akt mbyllet mandati gjashtëvjeçar i Sadushit në krye të institucionit. Sipas Gjykatës së Lartë, sfidat kryesore të kësaj periudhe ishin ulja e numrit të çështjeve të prapambetura, përmirësimi i cilësisë së vendimeve gjyqësore dhe rritja e transparencës ndaj publikut.

Në fjalën e tij, Sadushi falënderoi kolegët për përkushtimin ndër vite dhe kujtoi kushtet në të cilat e nisi detyrën: një gjykatë me vetëm një gjyqtar dhe me mijëra çështje në pritje. Ai bëri të ditur se nuk largohet nga institucioni, por do të vazhdojë të shërbejë aty si gjyqtar.

"Për mua, roli im si kryetar përfundon sot, por përgjegjësia ime si gjyqtar i kësaj gjykate vazhdon. Do të vazhdoj të punoj krah jush me të njëjtin përkushtim ndaj institucionit dhe ndaj qytetarëve që presin drejtësi", tha Sadushi.

Panda e cilësoi marrjen e detyrës si një përgjegjësi të madhe ndaj Kushtetutës dhe qytetarëve. Kryetari i ri vlerësoi përpjekjet për rindërtimin e institucionit dhe theksoi se besimi i publikut te drejtësia kërkon standarde të larta në vendimmarrjen gjyqësore dhe menaxhim efikas të proceseve në gjykatë.

"Besimi publik ndërtohet përmes cilësisë së vendimeve gjyqësore, arsyetimit gjyqësor të qartë dhe të qëndrueshëm, menaxhimit efikas të proceseve dhe llogaridhënies institucionale", deklaroi Panda.