Skenderaj vendos ekran të madh në shesh: Drenica pret vendimin e Hagës për katër krerët e UÇK-së

Në sheshin "Adem Jashari" në Skenderaj pritet të mblidhen qytetarë që nga mëngjesi i të mërkurës, më 16 shtator 2026, për të ndjekur në një ekran të madh shpalljen e aktgjykimit të Gjykatës Speciale në Hagë ndaj katër ish-krerëve të Ushtrisë Çlirimtare të Kosovës. Komuna e Skenderajt ka njoftuar se organizimi fillon nga ora 9:00, ndërsa vendimi pritet të shpallet nga ora 10:00.

"Ftojmë qytetarët të jenë të pranishëm dhe ta përcjellim së bashku këtë moment të rëndësishëm në ekranin e madh, me shpresën që drejtësia do të triumfojë dhe çlirimtarët tanë do të shpallen të pafajshëm", thuhet në njoftimin e Komunës së Skenderajt.

Pritja nuk kufizohet në shesh. Në Negroc, fshatin e lindjes së Jakup Krasniqit, ish-kryetarit të Kuvendit të Kosovës, është vendosur një pankartë me mbishkrimin "Negroci ju pret!", e shoqëruar me fotografitë e katër ish-krerëve të UÇK-së që po gjykohen në Hagë. Mesazhi është vendosur pak orë para 16 shtatorit.

Aktgjykimi pritet të shpallet ndaj Hashim Thaçit, Kadri Veselit, Rexhep Selimit dhe Jakup Krasniqit. Aktakuza aktuale kundër tyre është dorëzuar më 27 shkurt 2023.

Sipas aktakuzës së Zyrës së Prokurorit të Specializuar, pjesëtarë të UÇK-së, gjatë periudhës mars 1998-shtator 1999, kishin kryer krime lufte dhe krime kundër njerëzimit, duke arrestuar dhe ndaluar persona civilë në mënyrë të paligjshme, duke i trajtuar në mënyrë mizore, torturuar dhe zhdukur. Ndër akuzat bëjnë pjesë edhe vrasjet e paligjshme.

Prokurori Jack Smith i ngarkoi Thaçin, Selimin, Krasniqin dhe Veselin edhe me akuzën se ishin në dijeni se krimet ishin duke ndodhur dhe nuk ndërmorën asnjë veprim për parandalimin e tyre, por kishin nxitur kryerjen e tyre. Në aktakuzë thuhet se Thaçi dhe të tjerët nxitën sulmet ndaj kundërshtarëve dhe nxitën vrasjen e tyre.

Sipas Prokurorisë, krerët e UÇK-së, përmes deklaratave publike e veprimeve në terren, frikësuan, denigruan dhe eliminuan kundërshtarë, duke kërkuar të pozicionoheshin si i vetmi zë dhe si i vetmi përfaqësues legjitim i shqiptarëve të Kosovës. Pjesë e aktakuzës 68-faqëshe janë edhe pretendimet për vrasje të paligjshme, të kryera, sipas Prokurorisë, në Likoc, Jabllanicë, Llapushnik, Drenoc, Malishevë, Bajgorë, Majac, Zllash, Kleçkë, Kukës dhe Rahovec, në territore të ndryshme të Kosovës dhe Shqipërisë.

Të akuzuarit nuk janë shpallur fajtorë për asnjë nga këto pika, derisa Dhomat e Specializuara të shpallin vendimin e tyre.

Paralelisht, më 6 dhjetor 2024, Gjykata Speciale njoftoi për një aktakuzë të re kundër Hashim Thaçit, për të cilën ai është deklaruar se nuk e pranon fajësinë. Sipas kësaj aktakuze, Thaçi, së bashku me Hajredin Kuçin, Bashkim Smakajn, Isni Kilajn dhe Fadil Fazliun, akuzohen për ndikim në dëshmitarë. Smakaj dhe Fazliu janë liruar me kusht më 10 shkurt 2026.