Skënderaj: arrestohet i kërkuari për krime lufte kundër civilëve në Maj-Qershor 1998

Gati tri dekada pas ngjarjeve për të cilat dyshohet, një burrë që ishte në kërkim policor për krime lufte kundër popullatës civile ka përfunduar në pranga në Skënderaj.

Arrestimi u bë pas një pune hetimore dhe u bë i ditur në raportin 24-orësh të Policisë së Kosovës. Sipas policisë, vepra penale për të cilën dyshohet personi lidhet me periudhën maj-qershor të vitit 1998 në Skënderaj. "Pas një pune hetimore është arrestuar i kërkuari mashkull kosovar i cili ka qenë në kërkim policor për veprën e lartcekur", thuhet në raportin e policisë.

Pas arrestimit, rasti kaloi në duart e prokurorisë. "Me urdhër të prokurorit i dyshuari dërgohet në mbajtje", njofton policia.

Autoritetet nuk e kanë bërë publik identitetin e të dyshuarit dhe as datën e saktë të arrestimit. I arrestuari mbetet i dyshuar dhe gëzon prezumimin e pafajësisë derisa gjykata të vendosë ndryshe.