Siguria e rajonit në tryezë: Ulutash pret në "Film City" komandantin e Shtabit të NATO-s në Sarajevë

Në Shtabin e KFOR-it, në Kampin "Film City" në Prishtinë, komandanti i misionit të Forcës së Kosovës të udhëhequr nga NATO, gjeneralmajor Özkan Ulutaş, priti gjeneral brigade James C. Fowler, komandant i Shtabit të NATO-s në Sarajevë. Tema kryesore e takimit ishte situata e sigurisë në rajon.

Gjatë bisedës, Ulutaş rikonfirmoi angazhimin e KFOR-it për të garantuar një mjedis të sigurt dhe të mbrojtur për të gjithë njerëzit që jetojnë në Kosovë, në çdo kohë dhe në mënyrë të paanshme. Ai i prezantoi mysafirit aktivitetet që misioni po zhvillon aktualisht, si dhe prioritetet kryesore të tij.

KFOR-i vijon ta zbatojë mandatin e vet mbi bazën e Rezolutës 1244 të Këshillit të Sigurimit të OKB-së të vitit 1999, që e ngarkon me kontributin për një mjedis të sigurt dhe të mbrojtur për të gjithë banorët e Kosovës, si dhe me garantimin e lirisë së lëvizjes.

Ky mision kryhet në koordinim të ngushtë me Policinë e Kosovës dhe me Misionin e Bashkimit Evropian për Sundimin e Ligjit në Kosovë (EULEX), në përputhje me rolet përkatëse të tyre si aktorë të reagimit ndaj çështjeve të sigurisë.