Shtatë vatra zjarri aktive në Shqipëri, 467 forca në terren – flakët larg banesave

Zjarret vijojnë të mbajnë të mobilizuara qindra forca nëpër male e fshatra në Shqipëri, por situata paraqitet në përmirësim në disa nga zonat e prekura. Sipas Ministrisë së Mbrojtjes, deri në orën 14:00 të 17 gushtit ishin regjistruar 12 vatra zjarri, nga të cilat 7 mbeten aktive dhe 3 janë vënë nën monitorim.

Autoritetet theksojnë se, pavarësisht përhapjes së flakëve në disa pika, aktualisht nuk ka rrezik për zonat e banuara në vatrat kryesore ku vijojnë operacionet.

Në malin e Dajtit, në Tiranë, forcat operacionale po punojnë të mbështetura nga 50 efektivë të Forcave të Armatosura dhe dy helikopterë të Forcës Ajrore, ndërsa banesat nuk kërcënohen. Në Vakumone situata është nën kontroll dhe zjarri është izoluar, kurse zona e Priskës mbetet në monitorim.

Një tjetër front i nxehtë është ai në Gurë-Lurë, në Dibër, ku janë vendosur 180 forca bashkiake, 15 forca policore, 30 efektivë të Forcave të Armatosura dhe dy avionë Air Tractor. Hapja e korridoreve ka penguar përhapjen e flakëve drejt banesave, të cilat, sipas autoriteteve, nuk rrezikohen.

Në Qafë-Helmës zjarri është shuar nga krahu i Bulqizës dhe vijon vetëm në drejtim të Selishtës, pa rrezikuar banesat. Në Bruç të Matit operacioni po zhvillohet në terren të vështirë, gjithashtu pa rrezik për zonat e banuara.

Në Lufaj të Mirditës punojnë strukturat në terren; dy mjete zjarrfikëse të Forcave të Armatosura, me 9 efektivë, janë pozicionuar pranë banesave në lagjen Caraj për gatishmëri, ndërsa vatra nuk paraqet rrezik për shtëpitë. Në Fushë-Lajë të Pukës operacioni zhvillohet me 2 automjete zjarrfikëse, 9 efektivë të MZSH-së, 7 forca pyjore, 46 forca bashkiake, 16 vullnetarë dhe 40 efektivë të Forcave të Armatosura, po ashtu pa rrezik për banesat.

Ministria e Mbrojtjes bën me dije se situata është përmirësuar në disa prej vatrave, ndërsa kapacitetet tokësore dhe ajrore mbeten të përqendruara në zonat ku zjarret vijojnë të jenë aktive. Në total, në terren janë angazhuar 467 forca operacionale dhe 34 automjete zjarrfikëse. Vetëm Forcat e Armatosura po mbështesin operacionet me 120 efektivë, 2 automjete zjarrfikëse, 2 helikopterë dhe 2 avionë Air Tractor.