Shtatë të vdekur në rrugën A66, policia britanike arreston 12 persona për krim të organizuar

Një "Volkswagen Passat" që lëvizte në drejtim të kundërt në rrugën magjistrale A66, duke iu shmangur ndjekjes së policisë, u përplas drejtpërdrejt me automjetin policor. Nga përplasja mbetën të vdekur dy policë dhe pesë të rinj që udhëtonin në veturën në arrati. Tragjedia ndodhi në rajonin e Teesside-t, në Britaninë e Madhe.

Policët e vrarë në detyrë janë Matthew Blades, 37 vjeç, dhe Tom Clough, 38 vjeç. Pesë të rinjtë në "Passat", Cole Robert Worthy 17 vjeç, Theo Ray 17 vjeç, Macaulay Sedington 18 vjeç, si dhe Michael Robert Cahill dhe Jacob Matusiak, të dy 23 vjeç, u shpallën të vdekur në vendngjarje.

Policia e Cleveland-it njoftoi se, në kuadër të hetimit për ngjarjet që çuan te aksidenti, janë arrestuar 12 persona: nëntë burra dhe tri gra, të moshave nga 19 deri në 61 vjeç. Ata dyshohen për një sërë veprash penale, nga mbajtja e paautorizuar e armëve të zjarrit deri te pjesëmarrja në aktivitetet e një grupi kriminal të organizuar. Asnjë prej tyre nuk është shpallur fajtor nga një gjykatë.

Hetimin e drejton ndihmësi i shefit të policisë, Wayne Fox. "Ky është një hetim jashtëzakonisht dinamik dhe kompleks, i cili lidhet drejtpërdrejt me krimin e rëndë dhe të organizuar. Ngjarjet e asaj nate tragjike do të lënë një plagë të thellë dhe të përhershme në të gjithë rajonin dhe te qytetarët që ne mbrojmë. Detyra jonë është të hetojmë në hollësi të gjitha veprimet kriminale që çuan te kjo tragjedi dhe t'i vëmë para drejtësisë të gjithë përgjegjësit. Përgjigjja jonë e vendosur do të vazhdojë edhe në javët e muajt që vijnë, nuk do të tërhiqemi në luftën kundër atyre që rrezikojnë komunitetin tonë dhe merren me krim të organizuar", tha ai.

Fox shtoi se i gjithë personeli i shërbimit ka treguar forcë të jashtëzakonshme dhe ka vazhduar punën pavarësisht tragjedisë. "Dy kolegë tanë humbën jetën në detyrë, duke u shërbyer qytetarëve të Cleveland-it. Edhe pse kjo humbje do të ndihet ende për shumë gjatë, i gjithë personeli ka vazhduar të punojë me nivelin më të lartë të profesionalizmit. Jam jashtëzakonisht mirënjohës edhe për mbështetjen e madhe që marrim nga qytetarët e Cleveland-it, si dhe nga komuniteti më i gjerë policor", deklaroi ai.

Një nga adoleshentët e vdekur po e filmonte vozitjen e rrezikshme për TikTok pak para përplasjes fatale. Postimet e të rinjve në rrjetet sociale hedhin dritë mbi aktivitetet e tyre përpara tragjedisë. Në një video të bërë në maj shihet 18-vjeçari Sedington në një "Audi" që lëviz me shpejtësi të madhe nëpër një lagje, ndërsa e ndjek një automjet policor me dritat blu ndezur; vetura më pas kalon mbi një terren me bar, në përpjekje të dukshme për t'i ikur policisë. Në një video tjetër, të publikuar në një llogari të lidhur me të, shfaqet një "Nissan" i gjelbër që vozitet përreth para se t'i vihet flaka. Në fotografi të tjera në rrjetet sociale duken ai dhe një shok duke pozuar në vetura me maska të zeza në kokë.