Shtatë të vdekur në A66, Londra kërkon heqjen e videove që lavdërojnë vozitjen e rrezikshme

Një veturë që lëvizte në drejtim të kundërt në rrugën me dy karrexhata A66, pranë Middlesbrough-ut, u përplas me një automjet të policisë. Shtatë persona humbën jetën, mes tyre dy policë. Përplasja ndodhi në orët e para të së shtunës.

Pas aksidentit është raportuar se të paktën njëri nga të rinjtë që vdiqën në përplasje kishte qenë i përfshirë në filmimin e vozitjes së rrezikshme në video në TikTok. Hetimi i policisë vazhdon.

Qeveria britanike u ka kërkuar kompanive të mediave sociale të heqin përmbajtjen që shfaq njerëz duke vozitur në drejtim të kundërt të rrugëve. I pyetur për këto raportime, ministri i Mbrojtjes, Luke Pollard, tha se platformat duhet ta fshijnë vetë këtë material, përndryshe qeveria do të përdorë kompetencat që i jep Ligji për Sigurinë Online për t'i detyruar ato.

"Ne u kemi komunikuar atyre platformave të mediave sociale që kanë strehuar përmbajtje e cila feston këtë lloj sjelljeje të rrezikshme në rrugët tona që ta heqin atë përmbajtje", tha Pollard.

"Mendoj se të gjithë duhet t'i japim kohë policisë, por ka edhe gjëra që mund t'i bëjmë ndërkohë për t'u siguruar që interneti të jetë një vend më i sigurt për të gjithë, që nuk feston dhe nuk grumbullon shikime e për rrjedhojë nxitje financiare mbi njerëzit për të gjeneruar përmbajtje kaq të tmerrshme. Dua t'i shoh kompanitë e mediave sociale të bëjnë hapin përpara", shtoi ai.

Ministri iu referua edhe qëndrimit të vetë platformave ndaj rregullimit ligjor: "Është një nga arsyet pse ato kanë argumentuar kundër disa prej rregulloreve, duke thënë se mund ta mbikëqyrin vetveten. Epo, kjo është mundësia perfekte për ta demonstruar. Hiqni përmbajtjen që feston sjelljen e rrezikshme në rrugët tona."

Çështja e rregullimit të dobët të kësaj përmbajtjeje në rrjetet sociale doli në plan të parë pas revoltës publike në Irlandë, ku pesë adoleshentë u vranë javën e kaluar në një përplasje ballore me një veturë që lëvizte në drejtim të gabuar në një autostradë në qarkun Kildare. Komisioneri i Gardës, Justin Kelly, e cilësoi përplasjen ballore mes dy veturave si "të tmerrshme" dhe tha se "në disa raste" automjetet po drejtoheshin në anën e kundërt të autostradave për pëlqime në rrjetet sociale. Sipas transmetuesit publik irlandez RTÉ, TikTok nuk e pranoi ftesën për t'u paraqitur para një komisioni parlamentar irlandez për mediat, duke përmendur hetimin policor në vazhdim.