Shqiptari që ushqente të moshuarit e Bronx-it, në pranga të ICE pas seancës gjyqësore

Aleksander Nilaj shkoi në gjykatën e emigracionit për një seancë dhe përfundoi në paraburgim. Emigranti shqiptar, themelues i bankës ushqimore "Open Hand" në Bronx të Nju Jorkut, u ndalua nga Agjencia amerikane e Emigracionit dhe Doganave (ICE) dhe u dërgua në Qendrën e Paraburgimit Delaney Hall në Nju Xhersi.

Pasojat u ndien menjëherë në Lydig Avenue, ku ndodhet banka ushqimore. Shpërndarja e ushqimit është pezulluar dhe nuk do të rifillojë derisa Nilaj të lirohet. Për shumë banorë të zonës, sidomos për të moshuarit, vaktet e "Open Hand" kanë qenë mbështetje e përditshme. "Këtu ka shumë të moshuar që kanë nevojë për ushqimin që vjen bashkë me frutat dhe perimet", tha një banor i lagjes. "Këtu ka shumë njerëz që janë në nevojë të madhe."

Nilaj e nisi këtë punë rreth 20 vjet më parë, pasi emigroi nga Shqipëria në Nju Jork. Arrestimi i tij ka ngjallur zemërim në Bronx, ku shumë e shohin si një figurë të dashur të komunitetit. "Që kur ka ardhur këtu, ka qenë një bekim për komunitetin", tha Alex, një banor i Bronx-it. "Prandaj nuk mendoj se duhet të kthehet për diçka të tillë."

Autoritetet federale e shpjegojnë ndryshe rastin. Në një deklaratë, një zëdhënës i Departamentit amerikan të Sigurisë Kombëtare (DHS) tha: "Më 13 tetor 2026, ICE ndaloi Aleksander Nilajn, një emigrant pa dokumente nga Shqipëria. Ai hyri ligjërisht në Shtetet e Bashkuara përkohësisht më 1 tetor 2006 dhe, pasi i skadoi qëndrimi i autorizuar, mbeti në vend në mënyrë të paligjshme, duke shkelur ligjet tona. Ai pati proces të rregullt ligjor dhe më 22 korrik 2008 një gjyqtar emigracioni urdhëroi largimin e tij."

Në anën tjetër është kongresmeni Ritchie Torres, i cili konfirmoi se po lufton për lirimin e Nilajt. "Është një padrejtësi kundër familjes së tij dhe komunitetit që e do", tha Torres. "Qeveria federale duhet të përqendrohet te kriminelët më të dhunshëm dhe më të rrezikshëm, jo te njerëzit në shërbim të publikut si Alex."

Sipas Torresit, Nilaj nuk ka asnjë precedent penal dhe nuk ka asnjë akuzë ndaj tij. Avokati i tij, shtoi kongresmeni, do të kërkojë lirimin e tij përmes një ankimi.