"Shqiptari i Gjatë" ekstradohet nga Dubai: Belgjika e mbyll në burg pas dënimit me 10 vite

Një avion nga Emiratet e Bashkuara Arabe, një ulje në aeroportin ushtarak të Melsbroek dhe, menjëherë pas saj, dyert e një burgu belg. Kështu përfundoi të mërkurën udhëtimi i Denis Matoshit, 37 vjeç, të njohur edhe si Dizdari dhe me pseudonimet "Alduth" e "Shqiptari i Gjatë", i cili prej vitesh kishte jetuar në Dubai.

Ekstradimin e bëri publik vetë ministrja belge e Drejtësisë, Annelies Verlinden, përmes rrjeteve sociale. Ajo tha se operacioni u realizua në bashkëpunim me autoritetet e Emirateve dhe se ky bashkëpunim tregon se "nuk ka strehë të sigurta për kriminelët e drogës". Kabineti i saj nuk ka dhënë detaje të tjera për rastin individual të Matoshit.

Matoshi konsiderohet një nga drejtuesit e organizatës kriminale shqiptare "Kompania Bello". Këtë vit, drejtësia belge e dënoi me 10 vite burg dhe me një gjobë prej 80 mijë eurosh, në kuadër të dosjes së trafikut të drogës të njohur si "Yaramis". Gjykata urdhëroi gjithashtu konfiskimin e 7,5 milionë eurove të ardhura kriminale, të cilat iu atribuan atij.

Arrestimi i tij në Dubai kishte ndodhur rreth dy vite më parë, me kërkesë të autoriteteve belge. Prokuroria e Antwerp këmbënguli për ekstradimin, me qëllim që Matoshi të merrte pjesë personalisht në proceset gjyqësore që lidhen me aktivitetin e tij.

Dosja e prokurorisë përshkruan se si ndryshoi harta e trafikut në portin e Antwerp. Sipas saj, pasi klani Yaramis humbi pozicionin në port për shkak të konflikteve të brendshme dhe hetimeve gjyqësore, Matoshi nisi bashkëpunimin me Omar Govers dhe Najim EM. Autoritetet dyshojnë se ky grup organizonte tërheqjen e ngarkesave të kokainës nga kalatat 1700 dhe 1742 të portit.

Një dosje tjetër, në të cilën është përfshirë Govers, shton një fije financiare. Komunikimet e zbërthyera nga rrjeti i koduar Sky ECC thuhet se zbuluan dy transporte parash të kryera nga bashkëpunëtorët e Govers për Matoshin gjatë viteve 2020 dhe 2021, me një shumë totale prej 1,75 milionë eurosh. Këto pretendime ende nuk janë gjykuar: pjesa e çështjes që lidhet me Matoshin është ndarë dhe do të shqyrtohet në një fazë të mëvonshme.