Shqipëria drejt 46 bashkive: 15 njësi shuhen, vota vendimtare më 8 tetor

Harta administrative e Shqipërisë mund të ndryshojë brenda tre javësh. Projekti i Partisë Socialiste për reformën territoriale, i cili e ndan vendin në 46 bashki në vend të 61 që janë sot, pritet të kalojë në votim në seancë plenare më 8 tetor.

Deri atje, rruga është e shtruar me afate të ngushta. Kalendari i shqyrtimit pritet të miratohet nesër në Konferencën e Kryetarëve, ndërsa procedura parlamentare parashikon që grafiku i punës për shqyrtimin e nismës në Komisionin e Ligjeve të miratohet të hënën po në Konferencën e Kryetarëve, për të vijuar më pas me diskutimin në komision. I gjithë procesi do të mbyllet brenda dy javësh.

Kalendari nis më 23 shtator, kur projekti do të prezantohet në parim. Më 28 shtator zhvillohen dëgjesat, të përqendruara në një ditë të vetme, me Këshillin e Ministrave, Shoqatën Kombëtare të Bashkive të Shqipërisë, Shoqatën e të Zgjedhurve Vendorë dhe ekspertë të qeverisjes vendore. Më 2 tetor, Komisioni i Ligjeve do të paraqesë gjetjet e konsultimit publik të zhvilluar nga Komisioni i Posaçëm për Reformën Administrativo-Territoriale. Më 5 tetor nisma kalon në shqyrtim nen për nen dhe në tërësi, hapi i fundit para seancës plenare.

Në plenare, shumica socialiste do të ketë nevojë për 84 vota që projekti të miratohet.

Ndryshimi prek drejtpërdrejt 15 njësi. Sipas propozimit të Partisë Socialiste, numri i bashkive bie nga 61 në 46 përmes bashkimit të Rrogozhinës, Dimalit, Poliçanit, Patosit, Divjakës, Selenicës, Fushë-Arrëzit, Klosit, Maliqit, Këlcyrës, Memaliajt, Libohovës, Cërrikut, Belshit dhe Përrenjasit.