Shqipëria dërgon 17 ushtarakë dhe një helikopter në misionin e KFOR-it në Kosovë

Tirana do të kontribuojë me 17 ushtarakë dhe një helikopter në misionin e KFOR-it në Kosovë. Vendimin e miratoi Këshilli i Ministrave i Republikës së Shqipërisë në mbledhjen e radhës, duke përcaktuar angazhimin e Forcave të Armatosura shqiptare në këtë mision.

Kohëzgjatja e angazhimit dhe detajet e tjera operative të kontingjentit nuk janë bërë publike.

Në të njëjtën mbledhje, qeveria shqiptare miratoi edhe projektligjin “Për krijimin, mbajtjen dhe menaxhimin e rezervave minimale të sigurisë së naftës bruto dhe nënprodukteve të saj”. Akti përcakton rregullat për krijimin, administrimin, depozitimin dhe përdorimin e rezervave të sigurisë së naftës bruto dhe nënprodukteve të saj, ndërsa sipas objektit të projektligjit masat synojnë të garantojnë një nivel të lartë të sigurisë së furnizimit me naftë në Republikën e Shqipërisë.

Paketa e vendimeve përfshin gjithashtu një shtesë në vendimin e vitit 2020 që përcakton dokumentacionin dhe rregullat e hollësishme për evidentimin e ndërtimeve pa leje, si edhe ndryshime në rregulloren për mbrojtjen e sigurisë dhe shëndetit të punëmarrësve nga risqet e lidhura me ekspozimin ndaj agjentëve biologjikë në punë.

Këshilli i Ministrave miratoi po ashtu dhënien e mendimit të Kuvendit për një projektligj joqeveritar që parashikon ndryshime në ligjin “Për Institutin e Studimeve për Krimet dhe Pasojat e Komunizmit në Shqipëri”, ndërsa Mario Keputa u emërua zëvendësministër i Ekonomisë dhe Inovacionit.