Shkup: aparaturat CT të Radiologjisë jashtë funksionit, pacientët ndahen mes dy spitaleve

Aparaturat për tomografi të kompjuterizuar (CT) në Institutin Universitar të Radiologjisë në Shkup kanë dalë jashtë funksionit dhe po servisohen. Derisa të riparohen, pacientët që kanë nevojë për incizime po dërgohen në dy institucione të tjera të kryeqytetit. Njoftimin e ka bërë Ministria e Shëndetësisë, në koordinim me Institutin, duke shtuar se po punohet që aparaturat të rikthehen sa më shpejt në përdorim. Kur do të ndodhë kjo, nuk është bërë ende e ditur.

Sipas Ministrisë, referimi i pacientëve është riorganizuar që në fillim të kësaj jave, në mënyrë që ata ta marrin shërbimin në kohë. "Për sigurimin e vazhdimësisë së kujdesit shëndetësor, trajtimin pa pengesa të pacientëve urgjentë dhe diagnostikimin në kohë me CT, deri në rikthimin e aparaturave në funksion, pacientët po trajtohen, përkatësisht incizimet po kryhen në Spitalin e Përgjithshëm të Qytetit ‘8 Shtatori’ dhe në Klinikën Kirurgjikale ‘Shën Naum Ohri’ në Shkup", thuhet në njoftimin e saj.

Dy institucionet ndërrohen me turne gjashtëorëshe, duke mbuluar së bashku të gjitha orët e ditës. Departamenti për Radiologji Diagnostike dhe Intervenuese i Spitalit të Përgjithshëm të Qytetit "8 Shtatori" i pranon pacientët e referuar për CT nga ora 08:00 deri në 14:00 dhe nga ora 20:00 deri në 02:00. Klinika për Sëmundje Kirurgjikale "Shën Naum Ohri" merr përsipër oraret e tjera: nga ora 14:00 deri në 20:00 dhe nga ora 02:00 deri në 08:00.

Ministria thekson se shëndeti dhe siguria e pacientëve mbeten prioritet dhe u kërkon të gjithëve disiplinë: "Organizimi është i përkohshëm dhe do të zbatohet vetëm deri në rikthimin në funksion të aparaturave të Institutit Universitar të Radiologjisë. U bëjmë thirrje pacientëve dhe mjekëve që në mënyrë konsekuente ta respektojnë orarin e përcaktuar".

Institucionet shëndetësore, shërbimet dhe publiku, sipas Ministrisë, do të njoftohen në kohë për çdo ndryshim të situatës dhe për rikthimin e regjimit të rregullt të punës.