Shkollat e Prishtinës drejt bllokimit: greva rifillon më 6 tetor nëse pagat nuk rriten

Punëtorët teknikë të shkollave fillore në Prishtinë kërcënojnë se do të rikthehen në grevë më 6 tetor, nëse pagat e muajit shtator nuk paguhen sipas vendimit të Qeverisë së Kosovës për pagën minimale.

Paralajmërimin e ka bërë kryetari i Federatës Sindikale të Punëtorëve Teknikë të Sektorit Publik të Kosovës (FSPTSPK), Jusuf Azemi, i cili thotë se ka marrë informacione nga disa udhëheqës të Komunës së Prishtinës lidhur me fatin e memorandumit për pagën minimale.

“Kemi informacione nga disa udhëheqës të Komunës së Prishtinës se memorandumi për pagën minimale për punëtorët teknikë në shkollat fillore dhe të mesme është në tavolinën e Kryetarit të Komunës së Prishtinës, Përparim Rama, por ky i fundit nuk është duke e nënshkruar”, ka deklaruar Azemi.

Sindikalisti shkon më tej dhe vë në dyshim vetë vendndodhjen e dokumentit: “Kemi dyshime se ky dokument nuk është në tavolinën e Kryetarit, ose se Kryetari nuk është duke i ditur pasojat që kjo situatë është duke ua sjellë shkollave në Komunën e Prishtinës”.

Azemi ka theksuar se protesta e mëparshme nuk ka përfunduar, por vetëm është ndërprerë përkohësisht. “Njoftojmë opinionin, prindërit e nxënësve dhe vetë nxënësit se, nëse pagat për muajin shtator nuk janë në përputhje me vendimin e Qeverisë së Kosovës, të gjitha shkollat fillore do ta rifillojnë grevën, pasi ajo vetëm është pezulluar”, ka shkruar ai.

Në fund të reagimit, ai i është drejtuar me thirrje Komunës së Prishtinës: “Andaj, ju bëjmë thirrje që, me kokë të ftohtë, ta përmbushni obligimin lidhur me zbatimin e vendimit të Qeverisë për pagën minimale. Në të kundërtën, pa hezitim, më 6 tetor do të jemi në grevë”.

Nga Komuna e Prishtinës dhe nga kryetari Përparim Rama nuk ka një përgjigje publike ndaj akuzave të sindikatës.