Shkoi t'i pastronte plagën pacientit, infermierja e QKMF-së sulmohet në Kalabri

Kishte shkuar në shtëpinë e pacientit për t'i pastruar një plagë. Pak pas përfundimit të trajtimit, një infermiere e QKMF-së në Prishtinë dyshohet se u sulmua fizikisht nga i njëjti burrë, në lagjen Kalabria, raportoi Gazeta Sinjali.

Ngjarja ka ndodhur më 26 shtator, rreth orës 12:00, në rrugën "Pandeli Sotiri". Infermierja ndodhej aty bashkë me ekipin mjekësor për t'i ofruar trajtim një 52-vjeçari me inicialet B.K. Sapo intervenimi mjekësor mori fund, mes tyre dyshohet se shpërtheu një debat verbal, i cili më pas u përshkallëzua në sulm fizik ndaj saj.

Në vendngjarje ishte edhe një infermiere tjetër, e cila është intervistuar në cilësinë e dëshmitares. Rasti u denoncua disa orë më vonë në Stacionin Policor Jugu.

Pas konsultimit me prokurorin e shtetit, rasti është iniciuar me cilësimin "Sulm ndaj personit zyrtar". I dyshuari është liruar në procedurë të rregullt dhe prezumohet i pafajshëm deri në një vendim të formës së prerë të gjykatës, ndërsa hetimet për sqarimin e plotë të rrethanave vazhdojnë.