Sherr për para në Pejë: 23-vjeçarja lëndohet me thikë, vëllai i dyshuar në arrati

Një grindje për para brenda një shtëpie në Pejë, mbrëmjen e 26 shtatorit, dyshohet se përfundoi me një vajzë 23-vjeçare të lënduar me thikë në dorë. I dyshuari është vëllai i saj, i cili u largua menjëherë pas incidentit dhe ende ndodhet në arrati.

Sipas raportit të Policisë së Kosovës, i dyshuari u kërkoi para babait të tyre, shkaktoi dhunë në familje dhe më pas sulmoi edhe motrën.

Rrëfimi i viktimës jep më shumë detaje për atë që ndodhi. Ajo sapo ishte kthyer nga puna kur dëgjoi vëllain duke u zënë me babanë. Sipas deklarimit të saj, pasi babai refuzoi t'i jepte para, i riu dyshohet se mori një thikë dhe kërcënoi familjarët se do t'i vriste të gjithë.

Kur 23-vjeçarja u afrua për të kuptuar çfarë po ndodhte, vëllai dyshohet se e kërcënoi se do ta therte dhe e goditi në hundë, duke i shkaktuar gjakderdhje. Ai vazhdoi të lëvizte nëpër shtëpi me thikën në dorë, ndërsa ajo u përpoq ta incizonte me telefon. Pikërisht në atë çast, sipas rrëfimit të saj, ai dyshohet se e gjuajti me thikë dhe e lëndoi në dorën e majtë, para se të largohej nga shtëpia.

Viktima u dërgua për trajtim mjekësor në Spitalin Rajonal të Pejës. Pas kësaj, ajo refuzoi strehimin në një shtëpi të sigurt dhe, me dëshirën e saj, shkoi të kalonte natën te xhaxhai. 23-vjeçarja ka kërkuar gjithashtu masa ligjore për mbrojtjen e saj, përfshirë një urdhër mbrojtës.

Pas konsultimit me prokurorin kujdestar, rasti është iniciuar si "dhunë në familje" dhe "lëndim i lehtë trupor". Hetimet vazhdojnë, ndërsa i dyshuari nuk është gjetur ende.