SHBA tërheq bombarduesit nga baza britanike pas komplotit të dyshuar iranian

Pista e RAF Fairford ka mbetur pa bombarduesit amerikanë. Avionët me rreze të gjatë veprimi, që deri pak ditë më parë niseshin nga kjo bazë britanike në kuadër të luftës kundër Iranit, janë rikthyer në bazat e tyre në Shtetet e Bashkuara. Largimi vjen pak ditë pas arrestimeve në Britani për një komplot të dyshuar iranian që, sipas hetimit, synonte pikërisht këtë bazë.

Pentagoni e pranoi lëvizjen vetëm pasi ajo kishte përfunduar. "Ndonëse siguria operacionale na pengoi të konfirmonim lëvizjen e mjeteve dhe forcave tona në kohë reale, tani mund të pranojmë se të gjithë bombarduesit amerikanë që ishin vendosur në RAF Fairford janë rikthyer në bazat e tyre të origjinës në Shtetet e Bashkuara", tha një zëdhënës i Pentagonit. Deklarata nuk jep asnjë shpjegim për arsyen e tërheqjes. Një zyrtar tjetër i Pentagonit, i cili foli të dielën në kushte anonimiteti, pasi nuk ishte i autorizuar të diskutonte lëvizje të ndjeshme ushtarake, konfirmoi gjithashtu se bombarduesit janë ridislokuar në SHBA.

Largimi u vu re edhe nga qielli. Vëzhguesit e aviacionit panë të dielën një numër të madh bombarduesish B-1 duke u ngritur nga baza. Që nga ditët e para të luftës me Iranin, grupe vëzhguesish si Military Air Tracking Alliance kishin regjistruar dhjetëra bombardues B-52 dhe B-1 që operonin nga Fairford.

Hetimi britanik nisi pas një incidenti sigurie në bazë në fund të shtatorit. Javën e kaluar, në qendër të Londrës u arrestua një shtetas me shtetësi të dyfishtë britanike dhe iraniane, i dyshuar se po planifikonte një sulm terrorist. Gjithsej gjashtë persona janë marrë në paraburgim gjatë hetimit dhe më pas janë liruar me kusht. Autoritetet britanike e kanë lidhur incidentin me Teheranin, ndërsa Irani ka mohuar çdo përfshirje.

RAF Fairford ndodhet në kontenë Gloucestershire, rreth 160 kilometra në perëndim të Londrës, dhe për dekada me radhë është përdorur nga bombarduesit amerikanë gjatë konflikteve në Lindjen e Mesme. Baza shërben si pikë operacionale e përparuar për Komandën Amerikane të Goditjeve Globale, strukturën që menaxhon sulmet në distanca të largëta, dhe prej saj janë nisur bombarduesit B-1 të përfshirë në luftën kundër Iranit.

Tërheqja nga Britania nuk do të thotë largim i forcave amerikane nga rajoni. SHBA ruan ende një prani të konsiderueshme ushtarake në Lindjen e Mesme. Të enjten, një zyrtar amerikan tha se aeroplanmbajtësja e sapodislokuar USS Theodore Roosevelt dhe grupi amfib USS Malkin Island, anije që së bashku mbajnë më shumë se 7000 marinarë dhe 2000 marinsa, janë nisur drejt rajonit. Sipas tij, kjo lëvizje mund të sjellë që deri në fund të tetorit të ndodhen në rajon tri aeroplanmbajtëse amerikane.