ReklamëHapësirë reklame
ReklamëHapësirë reklame
Reklamë
Presidentit palestinez Mahmud Abas i është refuzuar viza për të marrë pjesë javën e ardhshme në Asamblenë e Përgjithshme të OKB-së. Të enjten, 193 shtetet anëtare pritet të votojnë nëse ai do të lejohet t'u flasë liderëve botërorë përmes videolidhjes.
Për të dytin vit radhazi, presidenti palestinez Mahmud Abas nuk do të mund të hyjë në Shtetet e Bashkuara për Asamblenë e Përgjithshme të OKB-së. Dy burime palestineze kanë thënë për BBC-në se Uashingtoni i ka refuzuar vizën e hyrjes për takimin që mbahet javën e ardhshme në Nju Jork.
Vendimi vjen pasi Departamenti i Shtetit amerikan zgjeroi sanksionet e vizave ndaj zyrtarëve palestinezë, duke i akuzuar ata se nuk kanë përmbushur zotimet e procesit të paqes. Në njoftimin e tij, Departamenti i Shtetit nuk e përmendi me emër Abasin, por akuzoi Autoritetin Palestinez dhe Organizatën për Çlirimin e Palestinës (OÇP) për "glorifying terrorism" (glorifikim të terrorizmit) dhe për përpjekje që konfliktin izraelito-palestinez ta "internationalize" (ndërkombëtarizojnë).
Sanksionet u vendosën fillimisht në gusht të vitit të kaluar, kur 80 zyrtarëve palestinezë iu refuzuan vizat për mbledhjen vjetore të OKB-së në Nju Jork. Autoriteti Palestinez u krijua si rezultat i marrëveshjeve të paqes së Oslos, ndërsa OÇP-ja u njoh pas të njëjtit proces si përfaqësuese zyrtare e popullit palestinez, në këmbim të njohjes së Izraelit dhe heqjes dorë nga dhuna.
Autoritetet palestineze nuk kanë reaguar ende ndaj njoftimit të fundit amerikan. Zyrtarët palestinezë i kanë hedhur prej kohësh poshtë akuzat e administratës Trump dhe të Izraelit, duke theksuar se kanë të drejtë të kërkojnë llogaridhënie ndaj një force pushtuese në bazë të së drejtës ndërkombëtare. Pas vendimit të vitit të kaluar për vizat, një përfaqësues i Abasit tha se hapi qëndronte "in clear contradiction to international law and the UN Headquarters Agreement" (në kundërshtim të qartë me të drejtën ndërkombëtare dhe Marrëveshjen për Selinë e OKB-së).
Sipas asaj marrëveshjeje, Shtetet e Bashkuara janë të detyruara të lejojnë aksesin e diplomatëve të huaj në selinë e OKB-së në Nju Jork. Uashingtoni, nga ana tjetër, ka deklaruar se mund t'i refuzojë vizat për arsye sigurie, ekstremizmi dhe politike të jashtme.
Vitin e kaluar, i penguar të udhëtonte, Abasi iu drejtua mbledhjes së liderëve dhe kryetarëve të shteteve përmes videolidhjes. I njëjti skenar mund të përsëritet: të enjten, të 193 anëtarët e Asamblesë pritet të votojnë nëse ai do të lejohet të flasë sërish në distancë.
Peshën politike të kësaj përplasjeje e tregojnë edhe shifrat e njohjes ndërkombëtare. Shteti i Palestinës njihet aktualisht nga rreth 75 për qind e 193 vendeve anëtare të OKB-së, mes tyre Britania e Madhe, Franca, Kanadaja dhe Australia. Nga pesë anëtarët e përhershëm të Këshillit të Sigurimit të OKB-së, Shtetet e Bashkuara janë i vetmi që nuk e ka njohur shtetin palestinez.
Vendimi amerikan vjen në një moment kur OKB-ja paralajmëron se situata humanitare në Gaza mbetet e rëndë pavarësisht armëpushimit të rënë dakord tetorin e kaluar. Sulmet ajrore izraelite dhe sulme të tjera vazhdojnë të godasin zona të banuara, duke shkaktuar viktima, dëme materiale dhe zhvendosje të reja të popullsisë.
Të martën, sipas zyrtarëve shëndetësorë dhe burimeve të Hamasit, sulmet ajrore izraelite vranë të paktën pesë palestinezë, mes tyre dy fëmijë dhe një komandant të Hamasit. Ushtria izraelite njoftoi se kishte vrarë një komandant të Hamasit në jug të Gazës dhe një luftëtar tjetër në veri; në të dyja rastet raportohet se u vra edhe një fëmijë. Organizata bamirëse britanike Medical Aid for Palestinians tha se një pacient u vra nga një dron izraelit në një qendër shëndetësore që ajo mbështet në Xhabalia, në veri të Gazës. Një zëdhënës i ushtrisë izraelite tha për BBC-në se nuk kishte dijeni për një incident të tillë.
Lufta në Gaza nisi pas sulmit të udhëhequr nga Hamasi kundër jugut të Izraelit më 7 tetor 2023, kur u vranë rreth 1.200 persona dhe 251 të tjerë u morën peng. Që nga ajo kohë, sipas ministrisë së shëndetësisë së Gazës, e drejtuar nga Hamasi dhe shifrat e së cilës konsiderohen të besueshme nga OKB-ja, janë vrarë më shumë se 73.790 persona.
Një zyrtar i lartë i OKB-së tha për BBC-në se po zhvillohet një garë me kohën për të siguruar qasje në energji elektrike dhe ujë gjatë dimrit.
Invalidët e UÇK-së, familjarët e dëshmorëve dhe të të zhdukurve, si dhe viktimat e dhunës seksuale gjatë luftës që jetojnë jashtë vendit lirohen nga tarifat për dokumente. Vendimi i MPJD-së është në fuqi që nga 14 tetori 2026.
