SHBA-ja dhe BE-ja rrisin presionin: Ngërçi po ia mbyll Kosovës dyert e mundësive

Presioni ndërkombëtar mbi klasën politike të Kosovës po forcohet. Ambasada e SHBA-së në Prishtinë ka përsëritur thirrjen amerikane për formimin e institucioneve, duke paralajmëruar se bllokada politike po i kushton vendit me humbje mundësish. Në të njëjtën kohë, Zyra e Bashkimit Evropian në Kosovë ka shprehur "shqetësim të thellë" për krizën institucionale në përshkallëzim.

Në një përgjigje për rtv21, Ambasada e SHBA-së theksoi se institucionet duhet të formohen në përputhje me Kushtetutën dhe me vendimet e Gjykatës Kushtetuese. "Udhëheqësit politikë të Kosovës duhet të bashkëpunojnë për të formuar institucionet në përputhje me Kushtetutën dhe vendimet e Gjykatës Kushtetuese. Populli i Kosovës pret që udhëheqësit të veprojnë në interesin më të mirë të vendit. Ngërçi i vazhdueshëm po i kushton Kosovës me humbje mundësish; udhëheqësit duhet t'i japin përparësi progresit dhe stabilitetit për të gjithë qytetarët", tha një zëdhënës i Ambasadës së SHBA-së në Kosovë.

Të njëjtin shqetësim e ka artikuluar edhe Brukseli. Zyra e BE-së në Kosovë paralajmëroi se vonesat në konstituimin e Kuvendit mund të pengojnë reformat dhe të rrezikojnë përfitimin e fondeve të BE-së. "Nga perspektiva e BE-së, ne jemi gjithnjë e më të shqetësuar nga kriza institucionale në përshkallëzim në Kosovë, veçanërisht nga fakti që Kuvendi mbetet i pakonstituuar pas skadimit të afatit kushtetues më 7 gusht", deklaroi për rtv21 zëdhënësi i Zyrës së BE-së, Nikola Gaon.

Sipas BE-së, vonesat në formimin e institucioneve mund të ndikojnë në zbatimin e reformave të rëndësishme dhe në aftësinë e Kosovës për të përfituar plotësisht nga mundësitë që ofron Bashkimi Evropian. Në veçanti, Brukseli paralajmëroi për ndikimin që ngërçi institucional mund të ketë në përfitimet e Kosovës nga Plani i Rritjes për Ballkanin Perëndimor.

Zyra evropiane u ka bërë thirrje partive politike të zhvillojnë një dialog efikas dhe konstruktiv, duke vlerësuar se vetëm një qasje e tillë mund t'i mundësojë Kosovës të ndjekë objektivat e përbashkëta dhe të zbatojë reformat e kërkuara nga qytetarët. "Respektimi i Kushtetutës, jurisprudencës së detyrueshme të Gjykatës Kushtetuese, sundimit të ligjit dhe qeverisjes së mirë kërkon që procesi konstituiv të vazhdojë pa vonesa të mëtejshme, me të gjithë aktorët që përmbushin përgjegjësitë e tyre përkatëse", theksoi Gaon.

Kuvendi i Kosovës mbetet i pakonstituuar edhe pas skadimit të afatit kushtetues, çka i ka hapur derën një thirrjeje të koordinuar nga dy partnerët kryesorë të vendit që procesi të mbyllet pa vonesa të reja.