SHBA godet Kubën me sanksione të reja: në listën e zezë nëntë subjekte dhe tre individë

Shtetet e Bashkuara vendosën të enjten një paketë të re sanksionesh kundër Kubës, duke futur në listën e zezë nëntë subjekte dhe tre individë për atë që Uashingtoni e cilëson veprimtari keqdashëse të drejtuara kundër SHBA-së.

Masat godasin drejtpërdrejt udhëheqjen e Institutit Kuban për Miqësi me Popujt (ICAP). Krahas tij, në listën e sanksioneve përfshihen nëntë subjekte shtetërore kubane, mes tyre ministria e ndërtimit.

Sekretari amerikan i Shtetit, Marco Rubio, deklaroi se sanksionet ndaj ICAP-it lidhen me nxitjen e një rrjeti të gjerë njerëzish që instituti mbledh për të vepruar kundër Shteteve të Bashkuara. Sipas tij, ky rrjet vepron kryesisht duke u paraqitur në mënyrë të rreme si shoqata arsimore ose kulturore, me qëllim gjetjen e mbështetësve të rinj dhe shtytjen e tyre drejt veprimeve ekstreme.

Rubio theksoi se në ditët e fundit Kuba është përpjekur të shfrytëzojë njëqindvjetorin e lindjes së Fidel Castros për të aktivizuar këtë rrjet dhe për të sjellë simpatizantë në Havanë, në mënyrë që ata të lidheshin me zyrtarë të qeverisë kubane.

"Me masat e sotme e bëjmë të qartë se administrata e Trumpit nuk do të tolerojë përpjekjet e regjimit kuban për të financuar represionin e vet, as vazhdimin e fushatës shumëvjeçare të veprimtarive subversive antiamerikane", deklaroi Rubio.

Sanksionet e reja vijnë pas një urdhri ekzekutiv të presidentit amerikan Donald Trump, të nxjerrë në maj, me të cilin u zgjeruan masat ndaj zyrtarëve shtetërorë kubanë, pjesëtarëve të forcave të sigurisë dhe mbështetësve të tyre.