Serbia kërkon ndihmën e BE-së: një i vdekur ndërsa flakët gllabërojnë mijëra hektarë

Një person ka humbur jetën dhe disa të tjerë janë plagosur ndërsa Serbia lufton prej ditësh me dhjetëra zjarre të përhapura në të gjithë vendin. Të premten, Beogradi zyrtarisht kërkoi ndihmën e Bashkimit Evropian për t'i vënë nën kontroll flakët.

Ministri i Punëve të Brendshme, Ivica Daçiç, njoftoi në një konferencë për shtyp se përmes Mekanizmit të mbrojtjes civile të Bashkimit Evropian janë kërkuar disa avionë dhe helikopterë zjarrfikës, si dhe automjete shtesë.

Situata paraqitet veçanërisht e rëndë në rezervatin natyror Deliblatska Peščara, rreth shtatëdhjetë kilometra në verilindje të Beogradit, ku deri tani janë djegur mbi 3.500 hektarë pyll dhe bimësi. Në shuarjen e këtij zjarri, krahas helikopterëve të Ministrisë së Punëve të Brendshme dhe pjesëtarëve të ushtrisë, që nga e enjtja është angazhuar edhe avioni rus Iljushin.

Përpjekjet për shuarje po pengohen nga era dhe terreni ranor e i vështirë për t'u kaluar, si dhe nga djegia nëntokësore e humusit. Për këtë arsye, zjarri shpesh riaktivizohet në vendet ku në pamje të parë dukej se ishte shuar.