Serb nga Suhogërlla arrestohet për krime lufte, Zyra për Kosovën flet për arrestim politik

Një burrë serb me inicialet R. T., nga fshati Suhogërllë i komunës së Skenderajt, është arrestuar të premten nga policia e Kosovës, i dyshuar se ka kryer krim lufte gjatë konfliktit të vitit 1999. Nuk dihet ende se me cilën ngjarje konkrete lidhet dyshimi ndaj tij.

Arrestimi ka shkaktuar reagim të ashpër nga Zyra për Kosovën dhe Metohinë, institucion i palës serbe, e cila pretendon se veprimi është kryer me urdhër të Albin Kurtit dhe ka motiv politik. Sipas kësaj zyre, qëllimi është rritja e presionit mbi popullatën serbe në Kosovë, si dhe krijimi i asaj që ajo e quan një narrativë të rreme politike për serbët si kriminelë, në kohën e një krize politike në Prishtinë dhe pas vendimit të gjykatës në Hagë ndaj ish-udhëheqësve të UÇK-së.

"Sa herë që Albin Kurti ka krizë politike në Prishtinë, ai përpiqet ta maskojë atë me sulme ndaj popullit serb në Kosovë dhe Metohi, me arrestime të kundërligjshme dhe të motivuara politikisht, me shembjen e pronave serbe dhe me hapa të tjerë të njëanshëm. Kështu edhe në këtë rast po kryhet arrestimi për një krim të supozuar lufte i një serbi që madje nuk ka qenë kurrë pjesë e forcave policore", thuhet në deklaratën e zyrës.

Zyra pretendon se arrestime të tilla bëhen shpesh pikërisht në periudha krizash politike në Prishtinë, për të larguar vëmendjen nga problemet e brendshme. Ajo bën të ditur se të arrestuarit i është siguruar avokat, ndërsa përfaqësuesit e saj në terren janë në kontakt me familjen e tij për mbrojtje ligjore dhe mbështetje.

Zyra paralajmëron edhe një hap ndërkombëtar: "Për rastin e tij, Zyra për Kosovën dhe Metohinë do të njoftojë të gjitha misionet ndërkombëtare përkatëse, me kërkesën që ta trajtojnë këtë rast me seriozitetin më të madh dhe të reagojnë ndaj këtij arrestimi të motivuar politikisht, në mënyrë që Radenkos, por edhe serbëve të tjerë të arrestuar padrejtësisht, t'u sigurohet respektimi i prezumimit të pafajësisë dhe i të gjitha të drejtave të njeriut dhe procedurale që kanë, të cilat për serbët janë të rrezikuara në kazamatet e Kurtit."

I arrestuari gëzon prezumimin e pafajësisë derisa një gjykatë të vendosë ndryshe.